Oté

Sa i apèl pa in viraj de mok sa ? Touléka, sa i rosanm bien !

Justin / 15 séptanm 2016

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi koné pa si ou la antandi lo pti prézidan Sarkozy apré konlimant mésyé Didier, mé mi pé dir aou in konpliman konmsa pou in rényoné i fé plézir… sak i oi pa tout an rouj, lo moun normal si ou i ve. Mésyé Sarkozy la di li lé bien kontan lo parénaz Didier Robert, pars sé in moun onète, intègre, konpétan épi na d’ot kalité ankor. Moin lé sir zorèy bann rouj la siflé kan la pass lo vidéo dann télé. Sa sé pou dir azot, kontinyé krétiké, kontinyé azot pars pandan éstan-la nana demoun bien plasé k’i aprésyé konm k’i fo nout prézidan. Konm i di : « La bav lo krapo i toush pa la blansh kolonm ». Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr. Moin lé bien kontan lir sak ou la ékri. Pou kosa solon ou ? Pa pars mi partaz out poinn vizé. An kontrèr ! Pars sa i done amoin l’okazyon pou ékri, a la plas mésyé Didié moin n’ora préfèr mon parénaz i fé pa tro dézord.

Dabor, d’apré sak mi antan dsi l’aktyalité zidisyèr, mésyé Sarkozy lé pa si tèlman rokomandab : mi vann konm moin la ashté, mé i parétré, li nana plis d’in kastrol zidisyèr anmaré avèk son ké. Dézyèmman, si mi pran l’égzanp la konpétans, mi oi in sèl domène mésyé Sarkozy lé konpétan sé kan li la raz la pint bann travayèr. La li lé bon é ziska tro bon ! Alon pa parl la guèr li la parti fé dann La Libye, in guèr ilégal, pou in mové rézon-mé nou va arparl de sa !-

Matant pou roprann kozman bann z’ansien mi pans i vo myé z’ète tousèl ké mal akonpagné é dann éska-la prézidan Didyé lé bien mal akonpagné. Tok ! Pran sa pou ou !

NB I paré promès sé dète é dann lo ka k’i prézant mésyé Didier l’avé bien di li siport mésyé Fillon. Zordi li siport Sarkozy. Sa i apèl pa in viraj de mok sa ? Touléka sa i rosanm bien.


Kanalreunion.com