Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Sa i di pa ou arien la manipilasyon l’opinyon ?

mèrkrodi 1 zwiyé 2015, sanm Justin

Matant zélida la ékrir Justin :

Mon shèr nové, mon spès salté, rouj-de-fon dovan l’éternité, moin la antann dann télé in kozman la bien fé plézir amoin. Anplis lété pa in roi d’koulou té k’i koz, té in l’ékspèr la politik. I paré li sé in politolog… bin kosa lo moun la di, La di la gosh lé moungé a plat koutir kouran moi d’désanm pou zéléksyon réjyonal. Pou kosa ? Pars la droit lé ini, é la gosh lé an konféti. In konféti i gingn pa kont in gran fèy papyé. Tok ! Pran sa pou toi !

Justin la fé pou répons :

Mon vyé matant k’I koz touzour la boush rouvèr, sa i étone pa moin de ou. Pars ou i kroi ké sé bann sondaz épi bann z’ékspèr k’i vote. I kol pa sa koko ! Lé vré zot i ésèy manipilé, lé vré zot i ésèy anbriye lo moun, mé zot i anparl pa zamé dsi la késtyonn program. Zot i anparl pa dmoun sak gouvèrnman i apèl l’égalité réèl, la défans bann droi, l’anvironeman é d’ot poin. Pou zot in zéléksyon sé Gasparin-Briné, Briné-Gasparin. Sé pa plis k’in batay kok ! Sa i amenn pa la gar ! tok ! Pran sa pou ou !

Matant Zélida i fé l’étoné :

Kosa i lé ankor so koméraz ? Kosa i lé so Briné-Gasparin ? Ou l’apré ésèy anbète lo moun ! Pars si l’moun i di i profèr in tèl plito k’in ot, zot i koné sak zot i vé kantmèm. Konm di lo kont sé pou l’ansanm son èv… son program, la manyèr li prézant sa, si lé kroiyab ou pa. Lo rès ou i pé gard pou ou ! tok ! Pran sa pou toi !

Justin la fé romark son matant :

Sa i di pa ou arien la manipilasyon l’opinyon ? Pou moin sa sé in n’afèr k’i égzis é plis k’i sava, oplis k’i manipil. Vi pans pa in zour baton i shanj de bout ? Tok ! Pran sa pou ou !


Inn modékri, inn ti lavi, inn komantèr ?

signaler contenu


Facebook Twitter Linkedin Google plus