Oté

Sa i pé z’ète in bon l’idé pou nou !

Justin / 20 février 2012

Sarkozy la fine instal son kartyé zénéral la-ba dann Paris. Tout suit bann léshèr d’bote bann gran télé épi bann gran zournal la di li pass la vitès sipèryèr. Sipèryèr, pa sipèryèr, sa mi koné pa. Mé sak moin la bien antann sé k’li vé koz avèk bann klass moiyène sirtou. Sa in drol zafèr sa ! Pars kan ou i vé ète prézidan ou i koz èk tout bann fransé, mèm si ou lé paré, pou avantaz in pé é pou taz lé z’ot. Solman ou sèy pa fé oir. Sarkozy i pran pa tousa prékosyon, li koz pa sanm bann ti-kolon. Sa la pa son traka ! Konm mon granmèr té i di :"La pa lo traka d’Sisya !"

Bann travayèr pov ? La pa son traka. Bann ti kontra ? I gard pa li ! Bann milyon shomèr ? La pa son sousi ! Bann milyon pti rotrète ? Sa i intérès pa li ! Bann péizan pov ? Li s’an fout sa. Sak i intérès ali, an plis bann rish-mé sa li di pa ! — sé bann klass moiyène, sak nana in bon moné déza... Tanpir pou sak la rès dsi lo karo. Tanpir pou sak la rèss dann fon la kivète, li lé pa la èk zot. Sak i intérèss ali, solon sak li di, sé bann klass moiyène. In tan noré apèl sa lo rasis sosyal, mé koméla, i diré sa sé in n’afèr bien akséptab par bann gro vaza k’i prétan fé l’opignon…

Pou sak i rode ral anou, bann Rényoné, dann trin-la, mi souète azot bone shans, mé mi pans zot ka lé dézéspéré. Pars si Sarko i koz pa èk tousa bann shomèr nana La Rényon, tousa bann ti kontra, tousa bann travayèr pov, tousa k’i viv sou lo pa d’port la povrété, bann minima sosyo, tousa bann nouvo shomèr. Si sa i intérès pa li, bin mi domann amoin kosa li vé vni fé issi. Touléka, zis par dsi son pèrmanans dann Paris, na in militan kominis i arète. Bin lo boug la rmète son bandrol pou fé konète son l’opignon. Sa i pé z’ète in bon l’idé pou nou ! Zot i kroi pa ?

Justin



Kanalreunion.com