Oté

Sa lé byin vré..
mé komans par done lo bon légzanp !

Justin / 28 séptanm 2009

Promyé minis La Frans i sort di dann in zournal la parète dimansh : "i fo pa transform lo viktime an koupab !". Li la byin rézon… Solman, li di sa dann in n’afèr d’zistis i s’pass dovan in tribinal La Fransé... Son dé mo, sé pou pran la défans son prézidan, dann in n’afèr i apèl sa l’afèr klèrstrime. Bon pou sa mèm, mé, moin pèrsonèl, noré été pli préférab li anparl sa dann d’ot sityasyon. Nana si tan tèlman k’lé pa fasil pou fé lo triyaz.
Gouvèrnman i vé fé kontrol bann fonksyonèr i tonm malade, mèm si z’ot travay la mine z’ote santé, pars i parétré sa i mète an danzé la sékirité sosyal... Kissa i lé la viktime, kissa i lé lo koupab. La poin in tronpaz rant lé dé la ?... Gouvèrnman i vé fé pèy l’inpo déssi larzan la sékirité sosyal i donn bann travayèr la gingn laksidann travay. Touzour par raporte lo trou la sékirité sosyal... La pa, la viktime k’i shanj an koupab ?... Gouvèrnman i pèy pa son dète konsèy zénéral, plis dé san soisante dis milyon l’éro, apré li di sé la fote konsèy zénéral si i goumante l’inpo. I trok lo rol la, non ?Pli pir, i di bann rényoné sé z’ot bann zéli l’otèr !
Kan dann la kèstyonn lo pri karbiran, lo roprézantan l’État, i pèrmète bann kamyonèr anbar konsèy rézyonal pou soidizan fé bèss lo pri l’ésans, alé oir sé lo préfé li-mèm k’i fiks lo pri la.Kisa lé viktime, kisa lé koupab ? I trok ankor in kou la ! An plis ké sa, i manipil bann rényoné .
Noré tro pou dir ! Alors kan promyé minis i pran la défans son prézidan, ni pé dir li lé dann son rol, ni pé dir lé pa fé otréman.Moin pèrsonèl, mi pans son kozman s’ré pli valab si li l’avé pa pass son tan, li épi son roprézantan, sèy fé prann anou po d’shanm pou pla kouvèr, makaroni pou la bouzi,savon pou fromaz..mansonz pou la vérité.
I fo pa transform in viktime an koupab. sa lé byin vré ! Mé i fo komans par done lo bon légzanp.

Justin


Kanalreunion.com