Oté

Sa lé pa bon, ditou, pou la démokrasi !

Justin / 24 zwiyé 2009

Na byin lontan, moin la antann in zistoir. Sète in jènn-jan kranèr la trap in lyèv épi li la vann an troi foi, troi prète, inn apré l’ote. Apré an avoir fé so fars-la, li la parti avèk in tantine, pou fé sivé avèk lo lyèv é lé dé la manz sa byin konm k’i fo... Lèrla, bann prète té i kroi zot i sa manz in manzé ékstra, la té blizé kontant azot do ri, brède épi la mori griyé. Zistoir-la i apèl "Bik-Bok" é, si mi tronp pa, i pé di, sa in konte popilèr.

Mé pou kossa mi pans so zistoir-la ? Pars sa i fé pans amoin laktyalité ; sa i fé pans amoin la politik la Frans. Mi pans zot la antann parl la késtyonn sondaz lo prézidan i fé komann dé foi par moi, pou konète si li lé popilèr, si in désizyon li pran demoun i gob sa konm zèf kri, épi lo bann sondaz i ansèrv galman in pé pou tash moiyin manipil lopinyon, fé prann demoun blan pou noir, makaroni pou la bouzi, savon pou fromaz, étsétéri-étsétéra-la ké lo ra...

Mé na in n’afèr i klosh pa la-dan : in zournal la droite i apèl "Le Figaro" épi in shène télé i apèl LCI na konésans sondaz-la, épi i anparl, épi i di sa in sondaz sé zot la komandé. Alors-la na in n’afèr zénan.
In onm de konfyans lo prézidan i di ziska "Le Figaro" avèk LCI la ashète lo mèm sondaz. Donkalor, lo sondèr la vann an troi foi lo mèm z’afèr ? La, lé i pé bizar é i arsanm konm zistoir "Bik-Bok", mé lé pli danzérab, vi k’so mayaz lintéré privé avèk lintéré l’aparèy d’État, sa lé pa bon ditou pou la démokrasi ! Sa lé pa bon pou lo pèp, pa bon ditou !

Justin


Kanalreunion.com