Sa sé arienk in fèyton sa mi di aou ! Oui, mé in fèyton danjérab !

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, mi antann dir désèrtin moun an parmi zot i aprésyé pa bann fèyton k’i pass dann télé. I paré in pé i pass lobtan pou fé bann réflèksyon filozofik, i rod lo bon, i rode lo mové, i rode sak lé moral épi sak lé pa moral. Siouplé, dousmann avèk moin, pou kosa alé rode loin konmsa ? A kosa i sèrv soupèz lo bon avèk lo mové koté. Pars, sèryèzman, zot i kroi pa demoun i shèrs arienk l’amizman la-dan ? L’amizman dann in l’amizman, mi pans sa lé natirèl. Sak lé pa natirèl sé d’alé rode, konm di lo kont, lo pou dann la tète na poin shové. Alor, siouplé, asé fé tourn zot réfléksion dann vide. In fèyton, sé in fèyton é ni plis ni moins. Donk alon kontant anou dé sa. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, sak ou i di i étone pa moin d’ou. I étone pa moin antann aou dir sa, pou in n’afèr k’i pass shak instan, troi-katrèr dan la zourné é demoun i arète kolé dovan zot l’ékran. Arienk lo tan zot i pass lé sifizan pou réfléshir dsi lo bien ou sinonsa si lo tor ké sa i fé dann l’éspri kréol : moin pèrsonèl, moin lé a d’mandé si afors rogardé, rogardé é rogardé si dmoun i fini pa par pèrd konm i di, lo sans kritik.

Dézyèm z’afèr, la télé sa i fé avèk larzan é sa nana son bann rosète pou éskotch aou dovan out l’ékran. Oplis ou i rogard oplis ou i vé rogardé, oplis ou i fini par trouv lo zafèr intérésan. Matant, ou i pans pa sa nana son rosète sa ? Ou i pans pa sa i fé konm in l’adiksyon, konm la drog, konm sigarète, konm zamal. Lé vré sé in drog ou i boir pa, la pa non pli in n’afèr ou i manz sansa ou i fime, mé sé konm di lo kont in drog imatéryèl. Ou i pans pa sa i égzis ?

Final de kont, ou i pans pa mèm si sé in fèyton, ébin fèyton-la lé riskab ète danjérab pou la moral bann éspéktatèr ? Tok ! Pran sa pou ou !