Oté

Sak i avans pa, i rokil ! Fransh vérité !

Justin / 25 zwiyé 2016

Sé pa si zot la antann mé i paré ké dann l’éstrésité nout péi i tiliz, la par l’énèrzi ronouvlab la goumanté. Moin la antann dir son par zordi sé trant pou san lo total-kapital l’éstrésité ni ansèrv. Lé bien non ? Zot i kroi pa moin ? Mi san, konm k’i diré ké zot lé pa kontan avèk in n’afèr konmsa. Zot ? Ki zot ? Bin, zot, bann partizan l’otonomi énèrzétik bien sir.

Zot k’i pans, é k’i kroi arienk dann l’ékonomi énèrzétik, lo pli gran sours nout l’énèrzi dirab. Zot k’i kroi dann dolo, dann lo van, dann solèy, dann la mèr sansa dann la biomass. Zot, konm moin k’i kroi dann l’otonomi énèrzétik. Nou na poin pétrol mé nou nana z’idé… Nou l’avé z’idé kan Paul Vergès l’été prézidan konsèy réjyonal.

Lé vré ké lé pli fasil gaspiye l’arzan pou fé vnir pétrol isi : na kék z’ané nou téi gaspiye déza sink-san milyon l’éro pou sa. Na inn-dé z’ané nou té fine ariv sète san milyon. Ni marsk dann la diréksyon lo milyar l’éro konm dépans initil… pa pou toulmoun bien sir pars in pé i gingn konm i di lo bèr, lo l’arzan lo bèr épi la krémyèr an plis ké sa dsi z’ot zonou.

Nou bann partizan l’otonomi énèrzétik, ni pans lo trant pour san... si lé vré é mi kroi k’i doi z’ète sé in foutaz dé guèl pars rant trant é san-pour san nana pou zoué, é oplis nou va marsh dosi los an, oplis nou va ansort anou myé. Sak i avans pa, i rokil. Fransh vérité !


Kanalreunion.com