Oté

Sak i défann PCR zordi i konbat pou la libèrté, la démokrasi, kont la diktatir

Justin / 16 mars 2012

Libèrté, démokrasi, dann danjé ! Moin lé sir, in pé l’apré mazine lé égzazéré di in n’afèr konmsa. Kosa ? Pars Parti kominis lé dann difikilté, ni di sa. In pé lé mèm riskab dir, oplis Parti kominis sar dann difikilté, oplis la libèrté épi la démokrasi sar an bone santé. Oui ! Mé kèl démokrasi, kèl libèrté ? Nou la fine gouté z’afèr konmsa, é pa arien k’in zour. Sak lé jenn, fé koz zot vyé famiy, sak lé rézonab, fé travay zot mémoir. Rapèl solman lo tan Perreau-Pradier... rapèl dann tan Debré !
Démokrasi-la té la diktatir, in poin sé tou.

Mi souvien in plantèr-bazardié, demoun té i kriy ali Toto. Li lé mor zordi. Lo mèr Sin-Dni la rotir ali son karo, pars li té i kashyèt pa son l’opinyon kominis. Mi souvien ankor dann tan-la — vi k’sa l’ariv amoin ! —, si out famiy té kominis, lo z’anfan té i gingn pa la bours départman pou fé z’étid dan la France. Mi souvien la frod dann z’éléksyon, partou dan tout La Rényon. Moin la grav dan mon mémoir lo tan kas-an-fèr, lo tan nèrvi, lo tan bann préfé voiyou... “Témoignages” té sézi karant-troi foi é bann polisyé la fane a-tèr tout bann karaktèr an plon. Mi souvien bann mor... nout bann martyr kominis. Mi rapèl osi bann militan zété dan la jol pars l’avé toupé protèsté. Mé inpé lé riskab dir té i mérit anou pars nou té dann Parti kominis... separatist, konm té i di sa dann tan-la.

In n’afèr ankor : la pa solman bann kominis la réprésyon té i tonm dési. Tout sak té i aprésyé pa lo pouvoir, é bin lo réprésyon galman té i tonm dsi zot. I komans par bann kominis épi i tonm dsi lé zot apré. Kroi amoin ! Parti kominis La Rényon, sé in ranpar kont la diktatir, kont la koripsyon, la frod, l’anprofitasyon. Tout sak lé avèk li zordi i konbat, fransh vérité, pou la liberté, la démokrasi, kont la diktatir.

 Justin 


Kanalreunion.com