Oté

Sak i kont pou zot, sé bat la lang pou fé roul demoun kari sou d’ri

Justin / 2 désanm 2011

Mèrkrodi, bann radyo épi bann télé la piloné. L’okazyon té tro bon pou bat tanbour pou prézidan la Réjyon. I donn pa kou d’pyé dan son vann do ri ! Pars lo promyé anonsèr, sé kant mèm lo promyé anonsèr, é larzan, konm i di, sé lo nèr la guèr. Pou kosa so foi isi ? Pars, a s’ki paré, mésyé Didier la ékri in lèt mésyé Sarko pou baz in bonbardèr d’lo isi La Rényon.

Boug-la lé for é lo prézidan lé for galman. Apré an avoir obliz lo préfé rakont anou in bann bobar, ziska mèm fé ralonz son né konm lo né Pinokyo té i ralonz shak foi li té i di in mantri. For mèm mésyé Didier kan li té apré rakont la vèy o soir, in bonbardyé la pa bézoin, vi k’sa i ansèrv de rien shé nou... L’èr-la mèm, gouvèrnman l’apré anons dé bonbardyé dolo i sava vni La Rényon. Biensir, dé bonbardyé la vni épi zot la donn in bon kou d’min pou tinn do fé. Malérèzman, lété fine fé bonpé déga.
Mésyé Didier la pi anparl de sa li. Li l’arèt konm martin ki kouzi in bon koup de tan. Mé i paré li la fé in lèt pou lo pti prézidan é i paré sèt-la i sort donn ali son l’akor pou fé arès lo bonbardyé shak ané péryod séshrès ziska 21 désanm La Rényon. Apré li va artourn la Frans. Pou koué 21 désanm ? In dalon la di amoin pars apré lo 21, i fo li sar donn in kou d’min Pèr Noèl pou èd port kado. Mi pans li té i plézant, pars sèryèzman, na dé foi nana la séshrès moi d’zanvyé, sansa févriyé ; donk si lo fé i déklar apré 21 désanm, nou sar dann mèm poin ké l’ot zour.
Fransh vérité, nou la bézoin in l’aviyon bonbardyé d’lo bazé isi é la kapasité pou èd bann péi nout réjyon. Mé Prézidan Sarko i oi pa sa konmsa ! Mé mésyé Didier i oi pa non pli lé shoz konmsa, pars pou zot, sak i kont, sé fé bat la lang pou tourn anou konm kari sou d’ri.

 Justin 


Kanalreunion.com