Oté

Sak i rasanm plito ké sak i diviz !

Justin / 4 novembre 2015

Lindi soir, dann in l’émisyon dann télé, moin la antann sak i apèl in politolog kozé. Kosa i lé sa ? Sé in moun k’i vé étidyé la politik konmsi l’été in syans égzak. Li té i done son poinn-vizé dsi bann parti… li té i done son dyagnostik konm in doktèr i fé dsi la santé é dsi la maladi… Moin pèrsonèl, mi ékout ali bien é mi trouv lé gonflé k’in moun déor-sanm pou moin – i koné pa pou vréman lo pèp rényoné, i pé fé lo doktèr bann parti rényoné. Konète lo sipèrstriktir, san konète lo l’infra-striktir sé konm k’i diré fé dé mirak.

Kan i poz ali in késtyon dsi nout parti, ala ké li réponn lo PCR lé pa an bone santé, pars li lé oblizé mète ali ansanm in n’ot parti olèrk fé konm kan li la fé l’alyans – solman, pétète li koné pa, i fo pa obliyé, dann l’alyans l’avé osi plizyèr parti konm Pari kominis, mé galman freedom, lo mra, lo parti sosyalis rényoné épi désèrtènn pèrsone la sosyété sivil.. Dann lo nouvo l’inyon nana sirtou lo PCR épi lo Progré. D’apré sak mi antann dann so l’inyon-la toulmoun lé pa parèy, mé nana plizyèr z’afèr rant lé dé, plizyèr kékshoz lé z’inn é lé z’ot i partaz é pétète sa va pèrmète azot fé z’ot l’avnir ansanm.

Vintan ? Lé long é lé kourt an mèm tan, vintan pou sort la kriz..

Dabor zot i pans nout sistèm i ariv o bout son kapasité . Konm li lé, li la poin lo moiyin pou règ lo bann problèm nout péi : son dévlopman, la késtyonn l’anploi, la késtyonn l’ansègnman avèk lo nonm z’ilétré ké nana, la késtyonn sékirité… Arzout èk sa lo nouvo z’alyé i pans la sityasion tèl-ke-sé i sava vni plizanpli grav. Pa pars nana la kriz zordi, mé pars nout péi lé an kriz dopi in bonpé d’zané é li lé pa dékolonizé pou vréman. Bann Progré i di zot i partaz lo mèm l’analiz ké PCR é zot i domann la riptir pou konstrui in Rényon Nouvèl.
Zot la shoizi sak i rasanm plito ké sak i diviz !


Kanalreunion.com