Oté

San éspoir d’rotourné pou sak la nyabou arivé !

Justin / 27 zwiyé 2011

Ankor in foi, la télé l’apré amontr demoun i krèv la fain. Ankor in foi, sa i éspas dan bann péi l’Afrik, la Korn l’Afrik so kou isi. Biensir sa i éspas dann péi nana la guèr. Nana la guèr épi in séshrès inkroiyab.

L’èr-la, moin l’apré domann, an moin-mèm, dé z’afèr. Promyé z’afèr, la séshrès-la, sa la pa ariv toudinkou sa ! Si mi tronp pa, dépi in bonpé d’moi, i anparl la séshrès dan bann péi-la. Donk, si l’avé in bon solidarité avèk bann pèp dann malizé, la pa zordi noré mète an plas in vré plan pou sirmont kriz-la. Mé, i fo kroir l’avé bann z’afèr pli inportan ké dis milyon demoun pov apré mor san soin épi san manzé. Par égzanp, l’avé bann bank pou port sékour. Sansa l’avé la guèr pou fé dan l’Afganistan épi dan d’ot péi. Arzout èk sa bann valèr demoun soidizan bien sivilizé pou défann.

Dézyèm z’afèr, i prétan dir bann téroris i anpèsh l’ède arivé. Zot la anvoy bann z’imanitèr dingué é zot la parpiy lo blé, lo farine, la poud do lé é tout lo tranbléman. Pars, an plis, banna nana lé z’arm é zot i koné an sèrvir. Dakor, mé bann z’arm la, ousa i fé sa ? Moin la touzour antann dir, la Frans, l’Amérik, la Risi, épi d’ot péi ankor i vann banna lé z’arm. Mé pétète la fé promète azot tyé azot rantre zot é pa tir dési bann z’imanitèr épi bann sivil san défans. Mé lé pli fasil tir dési d’moun san défans plito ké si d’moun anrajé, armé ziska lo dan.

Dési l’ékran télé, i défil in bann z’imaz lé dir pou rogardé. I défil, i défil ankor, é lé pa paré pou arété. Domoun i marsh, i marsh san arété, zanfan akroshé avèk zot payaka dépi landroi zot i arès ziska dann in kan, san éspèr rotourn in zour dann péi zot zansète. San éspoir d’rotourné.

Justin


Kanalreunion.com