Oté

San la kass sosyal, l’avé pa bézoin karavanyé !

Justin / 10 mars 2011

Moin la antann dann radyo, épi moin la vi dann télé, in group demoun la déside fé in karavane pou l’anploi épi pou lozman. Karavane-la i sava déplas in pé partou dann La Rényon épi va propoz bann z’élu épi bann kandida i prézant zéléksion sign in z’akor pou mète anlèr lo travay épi lozman pou dmoun. La sityasion lé si tèlman grav k’i pé dir sé in bon z’afèr ké lo maksimom demoun i déside vanj pou sa.

Fransh vérité, karavanyé, di amoin kékshoz ! Kosa n’ora spassé si l’avé pa koup pou kat san milyon l’éro shantyé dann komine Tampon, si l’avé pa dévir lo do avèk tram-train, si l’avé pa ronons la MCUR, si l’avé pa sabote lo plan pou l’otonomi dann l’énèrji, si l’avé suiv konm k’i fo lo plan TIC, si l’avé fé, konm nou l’été an kapasité, dé gran sèrvis, inn dan la proksimité, l’ot dann l’anvironman, zot nora mète an rout zot karavane ? Myé, si in dénomé Didier Robert, olèrk kassé sak té paré pou fé l’avé mète anplis an shantyé son dé mil bus, son gran route Sin-Pyèr-Sin-Bénoi, si son plan pou tourism avèk kat mil post travay té pa planté dann la tèr stéril, zot nora karavané ?

Arzoute èk sa, si gouvèrnman l’avé pa sabote lozman sosyal, si li l’avé pa ankouraz bann gro vaza pou blanshi larzan par la défiskalizasyon, si l’avé suiv bann propozisyon Zéta zénéro l’outre-mèr déssi la késtyonn lozman, si l’avé pa amène in politik la kass sosyal, noré pa bézoin karavanyé ! Si l’avé pa dévir le do nout dévlopman, si l’avé pa amène la kass sosyal, konm la droite la améné, l’avé pa bézoin karavanyé.

Justin


Kanalreunion.com