Oté

Sanm pou moin an sharète shaviré !

Justin / 24 désanm 2011

M’a dir azot in n’afèr : moin pèrsonèl, mi èm pa tout sak lé égzazéré. In légzanp ? Mi èm pa dmoun i gingn larzan an gaspiy. Pou koué ? Pars, konm nou lé dsi la tèr pou dé zour, mi pans pa nou la bézoin larzan an poundyak pou viv. Pars, mi pans galman la kantité d’moun na poin lo pourkoi an sifizans pou viv konm k’i fo. Pars, ni vé, ni vé pa, sa lé forséman lo rézilta l’ésploitasyon l’om par l’om, dirèktoman sansa indirèktoman.

Ala sak mi pans kan mi antan dir in foutbalèr i sa gingn dé mil é dé san. Uit san mil ero pou in moi pou in boug konm Beckam. Parl pi lé zot boug, pars i sifi alé rogard bann zournal dsi internet pou rann anou kont lo gapiyaz larzan. Mi antan bien in pé, apré di, alé mark lo bi konm boug-la, apré ou nora lo droi kozé... la pa tousala, vi k’lantrénèr PSG la gingn in kou d’zok, pars d’apré sak i paré li na poin la tournir k’i fo pou li fé son métyé dann in gran klèb l’Erop. Mi doi dir azot lo boug i fé pa pityé, pars avèk lo talan li nana li va gingn in post san tardé, mé sé la manyèr k’i fé sh... amoin, é sé lo rézon ki done ki fé sh... amoin galman…

Astèr, mi pans bann siportèr lo PSG. Moin la tandi dir in bon kantité rant zot lé o-flan é zot i dépans zot ti pé larzan pou zot plézir, pou zot passyon, i pé mèm di zot rolizyon. Mi koné zot i sava pran zot l’aboneman, ashté mayo, ashté kaskète. Tousala, pri for. Tousala, pou angrès biznès lo fout. In bann ti ruiso i fé bann gran rivyèr, in gran kantité posh vide, i fé inn-dé gran posh tro plin. I paré lo mond i marsh konm sa... Sanm pou moin, an sharète shaviré.

N.B. : in pti pansé pou Marie George Buffet, in gran minis kominis, sak l’avé oz dir, in zour, bann salèr dann l’éspor téi doi zète myé ankadré.

Justin


Kanalreunion.com