Oté

Sanm pou moin, parl l’ésklavaz zordi, sa lé bien néssésèr

Justin / 8 mars 2011

Matante Zélida la ékrir Justin :
Mon shèr nové, mon spès salté,
Mi konpran pa akoz toultan zot l’apré parl l’ésklavaz. L’ésklavaz par issi ! L’ésklavaz par la-ba ! Dann tan l’ésklavaz ! L’ésklavaz la pa fini ! étsétéra, étsétéra, la ké lo ra. Zot i konpran pa zot ranguène l’apré fatig demoun ? I fo fini avèk sa ! Pars solon zot, koz toultann sa i fé avans lé shoz ? Alon agard in kou dann l’avnir. I fo ète in pé érézonab kant mèm ? Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr,
Ou i koné, shak foi moin la antann in kozman konmsa, moin la pans lo moun i koz i vé pa oir la vérité an fas. Ou i pans, si i parl pa lésklavaz, sète-la nora pa égzisté ? Ou i pans, si i parl pa dsa, son déga dann nout mantalité v’arète d’in kou ? Matante, ou i koné nana dé shoz lé anfonsé dann tan nou lété pti marmay, si ni okip pa dsa, nou lé riskab ète malad tout in vi.
Plis la moityé nout l’istoir nou la pass dann léklavaz : l’avé zésklav in koté, bann mète l’ot koté, épi in zour, la di sa lé fini. Ou i pans sa l’arète sèk konmsa, sansa la kontinyé fé son shomin d’déga dann nout tèt, ziska zordi pétète... Matant, nout tout, aryèr-aryèr pti zanfan zésklav ! Nout tout, aryèr-aryèr pti zanfan zésklavazis ! Ni vé, ni vé pa, lé konmsa é pa otroman.
Mé in foi nou la di sa, nou lé pa kite ! Biensir ! Pars sak i fo, sé prépar in l’avnir pou nout pèp, pou nout péi. É bin, pou sa, i fo konète nout listoir, pou konprann nout prézan épi marsh déssi nout l’avnir. Inn i anpèsh pa l’ot. Sanm pou moin, parl l’ésklavaz zordi, sa lé bien néssésèr !

 Justin 


Kanalreunion.com