Oté

Sanm pou ou, sé par pir zalouzri ? Arienk sa !

Justin / 17 juillet 2013

Matant Zélida la ékrir Justin :

Mon shèr nové, mon spès salté, rouj-de-fon dovan léternité,

M’a dir aou in n’afèr. Dopi in bon bout lo tan, moin l’apré kas mon tète pou konprann pou kosa bann rouj-de-fon lé kont la rout litoral mésyé Didier. Mi ariv pa konprann. Pou kosa ? Pars zot la fé si tèlmann babiyaz la dsi. Zot la si tèlman anpil inn dsi l’ot zot bann mové rézon ké mon l’opinyon lété polyé, polyé, vèy pa koman. Dizon, konm zourite, kan i anvoy son bouyon noir, ou i sèy trouv ali ou i trouv pa. Agard a gosh ? Li lé pa la. Agard a droit ? Li lé pa la non pli. Avèk out fouine, ou i pik par isi ? Zéro kalbas. Ou i pik par laba ? Lo ki mimit. Pars bann politisien-la, moin lé fine suiv azot in pé é mi konpran zot kozman la pa touzour la vérité. Sak i kont, sé trouv in n’afèr pou dir. Aforstan moin la kalkilé, lo vré rézon, moin la fini par trouvé. Lo vré rézon, sé solman pa zalouzri par rapor mésyé Didier ké zot, bann rouj-de-fon, zot lé kont la rout litoral sis voi. Par pir zalouzri ! Tok Pran sa pou toi.

Justin la fé pou répons :

Mon vyé matant ki koz touzour la boush rouvèr,

M’a dir aou franshman, so kou isi, ou la bate la syans, san pour san. Alor, bann roprosh i fé so projé-la i kont konm in zéro la gosh in shif ?

Fé in rout, ou i koné mèm pa konbien li va kouté é konbien krédi va pèz dsi nou, nout zanfan, nout ti zanfan, d’apré ou, sa i kont pa. Ou i koné kant mèm gouvèrnman la déside pa donn in katsou pou lo sirplis ki sava kouté. Bin alor, pou ou, sa lé klèr konm lo d’rosh sa ? Arzout èk sa, in vyadik dsi loséan, a in gran profondèr, ou i pans sa lé fézab, alé oir pèrsone la pankor fé sa, dan n’inport ékèl péi. Sa i sa pa fé konm lo pon di Nor sa ? Sa i sava pa éfondré... promyé bal va fé dsi ? I mank pi. Arzout k’i lès anou san rout litoral avèk in dète vèy pa koman... i koné lo Komité réjyonal l’anvironman épi lo Komité nasyonal lé kont sa a fon, é pou ou, sa i fé arien. Zot lopinyon, i anvoy dingé. Lanvironman i kont pou la po patat sa pétète. Pou finir, m’a dir aou zis in n’afèr : ousa i sava rode la pyèr, galé épi débri pou fé lo dig ? Pars sanm pou moin, sa sé in n’afèr lé pa prévi, lé pa kui ditou. Boudikont, pétète v’alé shèrch sa Madégaskar... Matant, in bétiz, inn foi k’lé fé, lé fé… i pé pa rotourn an aryèr... mé si i arète avan, i kout larzan, dakor, mé lé moin grav ké si i fé. Tok ! Pran sa pou ou !

Justin


Kanalreunion.com