Oté

Sansa pangar tanponaz konm déor !

Justin / 24 octob 2015

Dopi yèr d’si télé, dann radio i anparl aryink tanponaz laba déor rant in bis sharzé d’moun èk in kamyon koté bordo la ba. In tanponaz grav minm, néna 42 mor, la plipar té brilé vif, i di sé lo pli grav laksidan dopi in bon bout tan. In bis ranpli èk domoun azé té i sava an parti pou trwa-kat zour la bat dann in kamyon. Lé vré in laksydan i provyin pa mé ni dwa domann a nou, si zordi nou néna pou vréman la sékirité kan ni pran la rout, vik néna doplizanpli loto i roul.

Lo tanponaz laba déor i ariv zis o moman ousa gouvérman, èk la lwa Makron lo donn lakor bann konpani tranpor pou fé konkirans èk lo trin. Minm lo prézidan la konpani, i di néna son bann bis. Sakifé ké boudikont li konkirans a li li minm. Sis mwa avan la konférans si lo klima, avan la kop 21, lo gouvérman la donn lakor san argard léta la rout, é konm pou fé lékonomi bann bis va plito roul d’si la nasyonal minm mandoné d’si la rout la kominn plito pran lotorout.

Ni koné transpor lo kar, konm kamyon i kontribi pou goumant bann zémisyon d’gaz, mandoné ni konpran pa télman poukoué i antèt konm sa. Lo tanponaz déor i fé mazinn a mwin zéléksyon èk lo prézidan la rézyon an 2010. Pou konkiranss lo tram-trin li lavé promèt 2500 bis san argard si néna shomin, si shomin lé asé larz tousala. Malorozman laktyalité i rapèl a nou, ké na pwin dot solisyon. Lo trin lé pli sir é daborinn lé pli prop. Sansa pangar tanponaz konm déor !


Kanalreunion.com