Oté

Sarko lo réformèr : Réformé an réformé, ziska tan demoun va réform ali !

Justin / 14 févrié 2012

Kan i anparl réform, pou in bonpé d’moun, sa sé in n’afèr dos, sa in n’afèr pozitif, konm i di zordi. In moun mi koné la di amoin, li konpran pa pou kosa Sarko lé pa popilèr vi k’li la fé plis réform ké tout bann prézidan la vni avan li. Moin la mank tranglé kan li la di amoin sa, pars Sarko èk moin i fé dé, é mi priyèr bondyé moin la poin pou manj in grinn sèl sanm li. Pars mèm in grinn sèl, sa i pas ar pa.

Pou kosa ? Pars lé sinp, in réform solon Sarko, sé artourn an aryèr, sé alé vèr in pli mové z’afèr olèrk alé dann diréksyon in pli bon ; La prèv ? Réform bann rotrèt : é bin, la ral an aryèr bann rotrété, la goumant lo l’az pou pran é la diminyé lo moné. La réform z’inpo ? La fé lo boukliyé fiskal pou avans sak nana lo pourkoi, é ral déyèr sak na poin. Rézilta ? Nana rant uit-san mil épi in milyonn moun o-flan la zamé pèy z’inpo i sava péyé sèt ané. Solman la diminyé lo nonm demoun i pèy lo l’inpo dsi la fortine. Shak foi sé lo fèb avèk lo pov la gingn kou d’zok dan la tèt. Nana in kantité z’afèr konmsa son gouvernman la fé. Sé pou sa, konm i di dann liv l’istoir, dan lo ka d’Sarko, i vo myé di la kontro-réform plito ké di lo réform.

Sa i fé pans amoin, dan la lang kréol, réform la nana plizyèr sans, é lé pa si tan tèlman pozitif ké sa. Réform in loto, sé gingn in l’aksidan é pi gingn romèt le loto an bon éta. In poul de réform ? I ponn pi asé d’zèf pou gard ali. In vash réform, sé in vash tamann, otroman di la vni éstéril, i gingn pi done lo pti, i gingn pi non pli done délé. Pou in politisien, kosa sa i vé dir ? Sanm pou moin, lo boug na pi in sèl shans pou argingn son post ; Sé sak i fo fé avèk Sarko, i fo demoun i réform ali, in foi pou inn bone foi. Sé lo méyèr posib !

NB : Pou l’inpo dsi lo rovni, la pa tyinbo kont l’inflasyon, donk sé konm di demoun, zot rovni la goumanté. Donk in bonpé pti kolon i sava pèy so z’inpo-la sèt ané, mèm si zot nivo d’vi la pa goumanté ditou.

 Justin 


Kanalreunion.com