Oté

Sarkozy èk la vérité i fé pa inn, mé dé !

Témoignages.re / 27 avril 2012

Dopi moin nana mon konésans, mi antann demoun di : in kominis, sé in moun fran. Mon vyé famiy té i armèt la-dsi, in moun la droite, sé in moun mantèr. Dann matématik, sa i apèl in laxyiome épi sa i pèrmèt ranz lé shoz suivan zot kalitégori, kisoi konm di lo kont par in l’aplikasyon dirèk, kisoi konm i di dann in rézonman a-kontrario. Moin na poin tro lo tan, ni tro la plas pou asplik mon rézonman, mé bann nouvèl zordi i pé pèrmèt amoin fé in l’ilistrasion sak mi sort di.

Mon l’égzanp, mi sava pran sa anparmi bann moun la ot. Alon pran l’égzanp Sarkozy.

Lo ga i sort di troi z’afèr. Promyé z’afèr, li la zamé di li sava fé la fèt lo "vré" travay. Non va ! Li la pa di sa, mé li la di li sava roganiz la fèt travay, mé « lo vré » travay, é myé k’sa, li la déklar sa dann télé épi son bann batèr tanbour la rant an mouvman. Donkalor, li la pa di, mé li la di !

Dézyèm z’afèr : li la di na sèt-san moské la di zot va vot pou François Hollande, mé bann moun lé roprézantatif bann mizilman i déklar zot la zamé antann parl kékshoz konmsa… Kisa la di sa ? Ousa sa lé marké ? Koman Sarko i koné sa ? Pèrsone i koné pa é lo pti prézidan na poin la prèv non pli sak li di.

Troizyèm z’afèr : solon Sarkozy, François Hollande la di li sava régilariz tout bann la poin papyé. Ousa Sarko la lir sa ? Dann kèl radyo li la antann sa ? Pèrsone i koné pa, mé li di épi li ardi, épi son bann batèr tanbour i bat ansanm.

Ala mon konklizyon : si in moun la droite, sé in mantèr, Sarko, pour sir, sé in moun la droite doublé d’in mantèr bien antandi. Li lé pa in kominis vi k’in kominis, sé in moun fran, é li la pa fran. Arzout èk sa, si la vérité na in sèl koulèr, i pé di, san tronpé, Sarko èk la vérité i fé pa inn, mé i fé dé. I dévir lo do inn a l’ot.

NB : Arienk in pti z’istoir pou kas ti-boi.

 Justin 


Kanalreunion.com