Oté

Sarkozy épi la késtyonn Mayotte : kan ou la pa fé sak ou i pouvé fèr, démyé ou i fèrm out také !

Témoignages.re / 31 mé 2016

Matant Zélida la ékrir justin :

Mon shèr nové, mon spès salté, rouj-de-fon dopi l’étèrnité, bien sir ou la antann parl la vizit Nicolas Sarkozy la vni fé isi La rényon ? An plin dann la kriz Mayotte. Ala in om la : kan Hollande i bouz pa pou l’oséan indien, Nicolas, pou son par i anons in solisyon. La kèl ? Ké La frans i ède bannzil komor pou trap z’ot dévlopman. Ala in l’idé sinp é ala in bon l’idé. Sa i vé dir kosa ? Sa i vé dir si la Répiblik komor lé édé dann son shomin pou trap lo dévlopman ébin son bann sitoiyin sar pa blizé rant dann kwasa-kwasa pou alé Mayotte. Sakinn shé soi-dann l’androi li rès !- é la guèr v’arété. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr,

kozé lé bon mé fèr lé méyèr. Mésyé Sarkozy na poin lontan li lété prézidan, avan sa li lété dann gouvèrnman konm minis l’intèryèr, avan ankor li té minis tout sort z’afèr. Akoz li la pa pran lo mézir k ‘i fo ? Akoz li la pran lo mézir k’i fo pa ? li la donn départman Mayotte, épi li la éspils plis vin mil pèrsone dann shak ané. Arzout èk sa kan la mèr la komans vni in gran simityèr avèk santène é santène de moun noyé, li la pran okin mézir.

Moin la pa antann dir la mète in dispozitif pou dékouraz bann klandéstin. Moin la pa antann dir la diskite avèk gouvèrnman komor pou trouv in solisyon. Moin la pa antann dir la mète lo moiyin maritime pou roshèrch lé kor tonbé dann l’oséan, pou roshèrch lo bann z’éfé pèrsonèl lo moun é pou konète kisa lé dispari é inform z’ot famiy. I fé pal o dèye la-ba don ?

Alor, kan ou la pa fé sak ou i pouvé fèr i vo myé ou i fèrm out také . Tok ! Pran sa pou ou !


Kanalreunion.com