Oté

Sarkozy la tourn lo do èk son bann promès, é plizanplis Rényoné la rès dsi l’bor shomin

Justin / 3 avril 2012

Mi oi dan nout zournal, i sava koz dési tout bann mansonz Sarkozy la di. Mi sipoz i fodré plisk’in gro liv pou koz la dsi. Tout demoun na ankor dan zot mémoir lo « travay plis pou gingn plis », sansa « lo prézidan lo pouvoir d’asha », épi na d’ot ankor, mé ni sava pa di tout, pars la plas na poin épi mi sava pa répèt sak nana dann zournal. Mé kant mèm, nana z’afèr nou la pa gingn dizéré, sé sak li la promèt dan son kozman lo sis novanm dé-mil nèf épi li la zamé mèt an aplikasyon konm té ki doi fé.

Yèr matin, dann radyo, RP Victoria, pou li atak F Hollande, la rovni dési bann promès Sarkozy pou bann péi l’Outre-mèr. Pou li, tout sak la promèt la mèt an aplikasyon. Bien sir, lé normal Victoria i défann Sarkozy, vi k’li lé dann mèm parti ké li. Konm i di souvan défoi : « Lo zo i soutien la shèr ! ». Mé mi pans, té pli préférab dépité-la i komans par rogard z’intéré La Rényon é pa sèt son parti l’UMP. Koz konm li koz, sé tourn lo do avèk La Rényon, son z’intéré, son bézoin dévlopman, son bézoin dan tout séktèr. Oté ! I sousyé pa nout ti-patri La Rényon don ?

Mé pou moin, lo pli gro roprosh i pé fé Sarkozy, sé pa ké li la pa konprann sak i fo fé pou bann péi l’Outre-mèr. Mi pans mèm li la bien konpri sak i fo fèr, é son kozman moi d’novanm l’ané 2009 té bien klèr. Biensir l’avé désèrtin poin té kritikab, mé lo boug la tras in voi pou nout l’avnir. Mé li, èk son bann minis, la tourn le do èk lo bann promès li la fé, é nou, Rényoné, nou la pa vi arien arivé.

 Justin 


Kanalreunion.com