Oté

Sarkozy-Woerth-Bettancourt and co : Lo zo i soutyin la shèr ziska tan k’i pé pi !

Justin / 7 zwiyé 2010

Matante Zélida la ékrir Justin :
Mon shèr nové, mon spès salté,
Sa la pa in sogré mi sava dir aou, vi k’sa i pass dann télé tou lé zour, dépi in bon koup de tan. Bann rouj-de-fon, épi bann roz-blan-blé la déside pass kal lo pti prézidan la Droite... Mé mon pti prézidan nana plis in tour dann son sak. Déza, dimansh, kan pèrsone té i atann pa, dé sou-minis la démissyoné. Shyin na lo pis, i fo ou i borde in pé ! Bann politikar lété apré ziguil azot si tèlman ! Solman li la fé dir, i toush ar pa in shové Eric Woerth, pars boug-la lé inossan, konm in pti zoizo k’i tète ankor son momon. Alors, kroi pa mon pti prézidan sé in zanfan tann. La pa zordi zot va yinbou pass ali kal. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr…
Sak mi èm èk ou sé oute fidélité pou la Droite. Sa i onore aou, pars dann kan la Droite-la, kal, zanbèk, amaraz zèrb, soss-trap, sa lé pa rar. Sé mèm in éspor byin pratiké shé zot. Mi tir mon kolé dann la, é pou lo rèss, démay sak i gingn ! D’apré sak mi lir, out ti prézidan nana konm in rosh dann son bèrsak i anpèsh ali byin najé... sé son minis Travay, méssyé Woerth. Boug-la l’apré gingn in mastapinaz bann médya, mi rakonte pa ou. Normalman, mi pans, lo prézidan noré té fine koup la korde pou pa koul ansanm… mé figuir aou, boug-la lété trézoryé son kanpagn é Liliane Bettancourt-la, a s’ki prétan, la donn in bon moné pou la kanpagn. Bou di kont, toute so moun-la lé konm shoushoute èk la mori. Sé pou sa oute ti prézidan, paré t’il, i arfléshi. An atandan, konm di lo kont, lo zo i soutyin la shèr ziskatan k’i pé pi.

Justin


Kanalreunion.com