Oté

Sé in késtyon lé ga ! Sa la pa in répons !

Justin / 13 févrié 2015

Na dé foi, ou i poz aou késtyon pou sèy konprann kékshoz. Lé pli préférab ké pa poz aou késtyon ditou épi konm di lo kont pran kékshoz pou sak li lé pa. Mé in pé lé pa la avèk sa épi, i ariv azot pran po d’shanm pou pla kouvèr, é makaroni pou la bouji. Pou kosa mi di sa ? Pars, si nou pran la politik, in pé i di zot lé kominis san savoir kosa i lé ozis, in pé i di zot lé ékolozis ou i pé domann aou pou koué, na mèm in pé lé sosyalis san tro savoir. Si tèlman ké in pé i sava dann in parti, épi i arkour dann in n’ot, avann filosh dann in troizyèm, étséréra, étsétéra la ké lo ra.

Moin la antann in moun, li lé li mèm lo gran résponsab dann parti ékolozis épi, bien antandi, ala ké li mète son kostime ékolozis pou li donn loson lé z’ot. Alé oir, moin, pèrsonèl mi domann amoin, dann mon kèr, kosa i fé dir ali li lé ékolozis. Par rofléksyon, par kalkil, par oportinis, par santiman ? Mi koné pa vi k’mi koné pa li, mé mi poz amoin késtyon kant mèm. Touléka, li di, z’afèr lékolozi sé bann ékolozis an promyé k’i doi okipé.

L’èr-la, mi domann amoin kosa i lé in l’ékolozis dann son filozofi, dann son idéal, dann sak li kroi épi dann son manyèr fé pou réspèk son bann z’idé. Pou ète fidèl par raport son bann z’idé. Sé in késtyon, la pa in répons !

Vokabilèr : L’ékolozi ?


Sa in syans i étidyé bann rolasyon rant bann kréatir vivan, rantre zot, épi zot l’anvironeman é vèrsi-vèrsa. In parti ékolozis, sé in parti k’i baz dsi so syans-la épi dsi la méyèr fason pou protèz la natir, protèz l’anvironeman épi, si mi tronp pa, fé tèl fason ké l’imanité i viv lo myé posib. Donk si na in ékolozi syans, na in lékolozi politik, in n’ot lé ékonomik, épi inn lé filozofik, in l’idéal si zot i vé. Akoz pa ? Donk lé konpliké, é si ou vé vréman ète dann in parti konmsa, i fo ou i travay pou konprann dann kèl sistèm ou i lé, épi dann kèl ka sa i pé z’ète pli for ké out l’intéré méskin. pou nout parti lé konmsa osi !

« Foutan i angrès pa koshon » – in kozman pou la rout.


Dann sans prop, mi oi pa tro sak i vé dir vi ké lo z’afèr sof si ou i pran ali bikanbl. Dann in sans pli zénéral, ou i pé pans foutan i fé pa avans lé shoz. Moukatèr sa i anmank pa ! Mé li vèks aou plito k’ésplik aou sak i fo fèr, é sak i fo pa fèr. Foutan, sa sé in n’afèr i fo pa manyé dann la pédagoji. Kroi moin galman dann rolasyonn famiy Si ou i mok in zélèv, ou lé sir out diskour i pass pi épi li artrouv ali boushé san pour san. Dann la politik, in krétik sa i pass, mé in foutan sa i fé pa ou in zami. Mi koné désèrtin moun, intélizans vèy pa, mé ziska zordi zot nana z’ènmi mortèl pou lo kasaz lé kui, momandoné zot la fé. Dakor, pa dakor avèk moin ? Fé travay zot koko, fé bouy zot matyèr griz. zot va oir si rant-rant ni tonm pa tazantan dakor rantre nou. Fé roulé Férèr !


Kanalreunion.com