Oté

Sé koi la bone santé ? Mi di pa pars zot va konète !

Justin / 26 zwin 2015

Zot i koné kréol koman i lé. Kan ou i domann nouvèl, i réponn aou : « Ptit Santé ! ». I fo dir lo mo « pti » sansa « ti » i sort souvan dann nout boush, mé alon rès dann domenn la santé.
Kosa i vé dir kan ou lé ann bone santé ? Pou bonpé d’moun, sé kan ou na poin in maladi doktèr i koné. Tansyon lé bon ! Koléstérol lé vayan ! Lo zyé, lo dan, lo bra. Tout morso lé daplon. Tout lé dos ! Donk doktèr i pé dir aou, suivan sak son bann liv i di ali : « Ou lé pa malad ! Donk ou lé an bone santé ! ». Bon pou sa mèm !

Mé moin la antann dann in télé in définisyon la sékirité siosyal, dann promyé tan la mète ali an plas, té i done dsi la bone santé : dabor ou lé pa malad dann out kor, apré ou lé bien dann out tèt. Troizyèm z’afèr, ou lé bien an parmi l’moun… Sa sé troi z’afèr, mé zot i konpran bien lé troi i doi marsh ansanm si ou i vé ète an bone santé. Si na inn i klosh pa, lé sir li va gate lé dé z’ot.
In maladi, sa i sap out moral épi ou lé pa bien an ou mèm, pou arshévé out rolasyon avèk lé zot I gate osi. Si ou lé pa bien dann out tèt, lé dé z’ot z’afèr lé ataké. Si out rolasyon an parmi l’moun lé pa bon non pli i afayi aou dsi lé dé z’ot poin…

Astèr i fo mète tousala an armoni, mé koman i fé ? Mi dir ar pa zot pars moin mèm mi gingn pa épi si mi di zot va konète konm di lo kont !


Kanalreunion.com