Oté

Sé koué la résponsabilité ? Nou na trod donèr dordr !

Témoignages.re / 4 zanvié 2014

Anon konpar in pé bann zénérasyon do moun é war si kèl koté manièr viv nou lafine arivé zordi dan nout péi ! Kèl dézastr ! In kalamité ! O plis ki aminn soidizan la kominikasyon, o pliss i dévlop la kouyonis, anfin solon moin, Justin ! A zot mi koné pa si zot va pans konm moin ?

Nou viinn viv in siklone : moin té ankor marmay, nout paran riink an rogardan lo sièl é lo bann niaz koman li tourn, minm la koulèr lo sièl, san konté bann zoizo d mèr i ariv dan lé o, an plinn zourné, nout gran moun i di : « é la dégaz anferm zanimo, klout in tol, mèt in gro galé dsi… koud van i sar arivé ».

Aprè, nout kaz an payi ék lo gro poto mitan antéré i tiin mié kin kaz an tol pozé si in soubasman an ros ; si i fo sové, minm dan la nuit, zanfan dann bra i sava. 1948 : mon monmon la parti son koté èk 3 ; mon papa la sov èk moin ! Son madanm (monmon)li té koné minm pa dan kèl diréksyon el la giny alé !

Landomin, pa bézoin météo, préfé, -tout fason navé poin radio- po konprann la i giny alé rod manzé po bèf : « justin, pran in kord, in goni mèt si out tèt, alé koup un paké zerb anba, la ravine lé pi tro for… »

Préfé i di personn i sort pa avan domin… météo i di siklone fini alé : ki kroir ?
Ou atann kèl ord ? Out kabri somanké la po krévé san manzé, fin giny la kranp dann park !
Pran out résponsabilité : ékout pa tou sé kouyon (pardon sof out respé) ; fé sak ou na po fé solon out priorité a ou, pa sak lé zot. Nou koné la sékirité.
Sé koué pran in résponsabilité ? Sé pa tro ékouté lé donèr dordr !

 Justin 


Kanalreunion.com