Oté

Sé la loi d’la vi !

Témoignages.re / 26 mars 2010

Matant Zélida la ékrir Justin :

Mon shèr nové, mon spès salté, vi koné byin konm mi èm méssyé Jean Paul, pars l’avé riyink li té kapab rédi lo rin avèk bann rouj-de-fon koman zot. So kou issi sé pa li, mé l’artrouv in n’ote, méssyé Didier, lo zoli garson di sid, pou pran la rolèv. Konm li lé jènn, mi promète azot bann landomin ki shante. Zordi zot i pèrd la réjyon, domin sar konsèy zénéral, apré-domin d’ote z’afèr ankor, ziska k’va arash lo kro bann mèr rouj de fon. Plé t’a dyé ké moin lé ankor déssi la tèr zour-la. Tok, pran sa pou toi !

Justin la fé pou répons :

Mon vyé matant k’i koz aryink la boush rouvèr, mi douté pa ké ou nora été kontan konmsa. Solman, si ou la byin rogard rézilta, bann droite la gingn karant sink pour san bann voi, Lalyans é lo PS, la gingn sinkante sink pour san. Donk out plan déssi la komète lé riskab kass par boute si dann kan sak i apèl "la gosh", bann parti lé in pé pli solidèr. Mé par l’fète, si ou i yèm lo Didier, ou i doi pa détèst lo Vergoz non pli, pars... éskiz mon pardon, inn la soutyin l’ote konm lo zo i soutyin la shèr. Ala pou kossa lo minoritèr la gingn zéléksyon... Kroi amoin matante, lo trète zordi, son poi lé o-fé domin. Sé la loi d’la vi !

 Justin 


Kanalreunion.com