Sé toute sak i fo !

In lang demoun i koz, sé in n’afèr vivan. Avèk lo tan, li shanj in pé, li transform, nana nouvo mo i aparète, nana bann vyé mo i disparète. Sak lé vré pou bann mo, lé vré ossi pou bann patoi, pou bann kozman. Mèm z’afèr pou la gramèr. Zot i pans, i fo argrété ? En touléka, nana d’moun i argrète, é sa sé in n’afèr vré pou toute bann lang. Lé vré pou fransé, lé vré pou z’anglé, lé vré galman pou nout lang kréol rényoné.
Konbyin foi ni antan in moun apré di : « A non ! La pa konmsa i koz kréol rényoné ! Sa la pa lo bon kréol nout famiy la amontr anou ! »... Sa i fé pans amoin, lo zour vin désanm, moin la antann dann in radyo, in madam apré poz késtyon déssi dé mo èl la antann : "sobatkoz", épi "moringuèr". El i di, é mi pans i doi ète vré, èl la zamé antann son bann vyé famiy di bann mo konmsa. Na in madam i fé pou répons, sa bann vyé mo, demoun la fine oubli in pé.
Moin, pèrsonèl, moin té kontan pars l’avé poin an parmi, in pé l’apré gaskone inn-a-l’ote, épi fasson demoun té i koz, té i done a konprann lété in n’afèr sèryé pou zot. Tanmyé si lé konm sa ! Pou mon par, kisoi in vyé mo, kisoi in mo nouvèl, kisoi in mo in moun la fé... porvik rantre nou, ni artrouv anou,ni konpran anou, sé toute sak i fo !

Justin

Lésplikasyon inn-dé pti mo :
sobatkoz : in diskissyon dovann moun, dovan an piblik.(sa in mo lé pa tro vyé)
moringuèr : in moun i zoué moring (moring sé in vyé mo, moringuèr lé pli nèv).
donn a konprann : fé konprann.
gaskoné inn-a-l’ote : inn i kass ti-boi l’ote.
kisoi : que ce soit(an fransé)