Oté

Séga’èl rékonpansé : Na la plas pou alé an avan !

Témoignages.re / 5 zanvié 2013

Mi èm bien kan l’aktialité i mèt in Rénioné sansa in Rénionèz anlèr. Dizon sa i ariv dan l’éspor, sa i ariv galman dann la kultur, dan la mizik. Dèrnié ka i sort arivé, sé lo viktoir Séga’el la parti ranport la-ba dann in péi l’Afrik i apèl Kot d’Ivoir. Lo juri la konsidèr èl té "lo méyèr artist féminin" dann konkour-la. Koman sa l’arivé ? Mi koné pa ! Koman èl la fé pou alé la-ba ? Mi koné pa. Akoz la romark aèl dann in péi loin konm sa ? Domann pa moin. L’ésansièl, sé k’larivé.

Sak mi koné, sé kan èl la di èl i sava dann in gran konkour internasional, moin la pans : "Mon dié sénièr, fé k’èl i gagn !". Kan èl la komans an plègn pars demoun té i gingn pa suport aèl par téléfone, moin la pans : "Ala ankor in kou ! Si sa la pa l’inzistis, é bin, mi koné pa koman sa i apèl !". Pou finir, lé shoz la aranjé, épi èl la fini par gagné. Bon ! Mé astèr ké èl la gagné, moin la komans domann amoin si èl té i mérit vréman son viktoir, pars i fo rokonèt nana bonpé z’artis La Rénion, é in bonpé an parmi lé déza sélèb. Bin koman i fé pou amontr son kapab dann in l’anvironman konm sa. Lé pa fasil ! Mé si èl la gingné, sé k’èl nana lo kapasfité k’i fo.

Ziska zordi, moin té i antann son bann son dann soiré dansant, é la pa ninport ki lé kapab fé valoir dann soiré dansant : i fo lo ritm, i fo la kadans, i fo in voi. Lo tèks i konpran pa tro dann in sal i fé bonpé dézord. Mé kan in l’artis lé dsi in sèn, la pi parèy ditou. La, demoun i jij aou, par out mizik, out son, out kadansé, épi l’anbians ou lé kapab mèt, épi ankor lo fé ou i gingn mèt. Moin la roparti ékout son shanson "Jalou" é, sanm pou moin, sèt-la lé pli valab ké lé z’ot. Na inn dé morso i ral amoin é d’ot moin. Shakinnn na son gou ! Shakinn i aprésié lé shoz son fason !

Kosa i rès pou fèr ? I fo kontinié monté, donk amélior lo paroli, travay lo son, pèrféksione lo zèst. Pou moin, na la plas pou alé an avan. Bravo kan mèm ti-madam pou lo viktoir ou la ranporté.

NB : Dernié group la gingn konkour-la, si mi tronp pa, sé Ziskakan, l’ané 1997. Sé dir si na l’avnir pou Sega’el.

 Justin 


Kanalreunion.com