Oté

Séga Kazimir lé riskab ète lontan dann l’aktyalité !

Témoignages.re / 26 février 2011

Moin na dan la tète in vyé séga. I antan pi sa dann radio koméla. Parol séga la lété, konm k’i diré, in pé an foutan. L’imour kréol sé l’imour kass lé kui... sa ni koné. Donkalor, shanson-la i di : « Amoin mèm Kazimir, mi koné pa lir, mi koné pa lir, mi koné pa ékrir. Pou lir mon zournal konm i fo, i fo li lé ranpli foto ».
Dann tan-la, in bonpé d’moun téi pans l’ilétrism té i doi disparète avèk dévlopman lékol. Oplis i fé l’ékol, oplis nana bann amontrèr kalifyé, oplis l’ilétrism té i doi kour kilote dan la min, an parlan an réspé. Lé vré l’Édikasyon nasyonal la bien dévlopé. Lé vré demoun instruiyé, sa nana in bonpé koméla. Lé vré galman, nana pli-z’an-plis diplomé. Vi k’nana shomaj an parmi bann jènn nana gro-gro diplome. I pé pa dir l’instriksyon piblik la fine fé fayite La Rényon, pars la pa vré.
Solman na konm in malédiksyon i tonm déssi nou. Déssèrtin i di : La Rényon i diviz an dé. Nana in pol la rishèss é nana in pol la mizèr, nana in pol travayèr é nana in pol shomèr, nana in pol demoun instruiyé é nana in pol demoun ilétré. Si l’avé solman in pti pé d’moun pov, in pti pé shomèr, é in pti pé d’moun ilétré nora pa été bien, touléka pou sak lé dann fénoir, mé nana in gran kantité demoun pov, demoun marké Pol anploi é demoun ilétré. É i vanj kont sa oui ! I mète larzan la-dan oui ! I koz la-dsi oui ! San trap in bon rézilta.
Méssyé Didier l’apré di partou li sava bar la route l’ilétrism, i sar mète larzan dédan, é nou va oir, nou va oir, sak nou va oir... Va oir kèl koté brinjèl i sharj ! Élas, ménélas, mon kèr lé an filas. In kotèr déssi in janm de boi ! La maladi lé la, mé lo médikaman lé pa bon. Donk, moin la bien pèr séga Kazimir lé riskab ète lontan dann l’aktyalité.

Justin

NB : lo bon médikaman sé mète la lang épi la kiltir kréol anlèr, sé dévlop la péi, séi donn léspoir d’moun. Lo rèst é koz la boush rouvèr.


Kanalreunion.com