Oté

Séga tipik morisien biento marké konm patrimoine l’UNESCO !

Justin / 26 zwiyé 2013

Mi souvien nana déza in bon koup de tan, Paul Bérenger l’avé fé in sézour La Rényon. Si mi tronp pa, lété dann tan in konférans éstraordinèr nout parti l’avé prézant lo plan d’sirvi. Donk lété par-la l’ané 1975. La vèy o soir, Paul Bérenger l’avé parti in soiré maloya, dann kann ! Kaziman dan la klandéstinité, épi li té i di toulmoun, maloya La Rényon i rapèl ali lo séga tipik son péi. Kan li té i parl lo séga tipik, mi pans li té i mèt par koté lo séga varyété pars fransh vérité, lé dé lé pa parèy. Inn i plonj son rasine dann tan l’ésklavaz... I fo dir, nou osi nou té i aprésyé bien lo séga akonpagné par lo ravane, triyank, konm sak Ti-frèr épi d’ot ségatyé otantik té i shant.

Dopi so tan-la, konm zot i koné, nout maloya la fé son shomin. Bann maloyèr la gingn dékorasyon avèk la Réjyon dann tan Paul Vergès lété prézidan. Nout maloya la sort dan la klandéstinité pou vni in pé dan la limyèr. L’ané 2009, la MCUR la prépar in dosyé séryé épi l’UNESCO la rokonèt ali konm patrimoine l’imanité. Tout sak la èm lo maloya dépi zot zénès lété kontan, pars boudikont, té in viktoir kont lo fénoir. In viktoir té i fé pa plézir bann rès déyèr, mé zot i vé, zot i vé pa, nout maloya lé anlèr.

Dopi moi d’mars 2013, l’UNESCO la désid aksèp étidyé lo ka lo séga morisien tipik. In bon nouvèl asiréman ! In bann z’onm de syans, z’onm de lèt, z’artis l’apré travay séryé dsi la késtyon é bann Morisien na bon éspoir zot séga tipik sar rokoni. Moin lé sir, zot sar kontan, zot sar fyèr, é lé normal. Nou, Rényoné, mi pans nou osi ni doi èt kontan pars si l’il sèr lé rékonpansé, nou va dir nou la èd rouv la port pou zot, é si nou la nyabou fé in n’afèr konm sa, la poin pou ral lo kèr. Pars, boudikont, nout maloya lé méritan, sa lé vré, mé lo séga tipik morisien, li osi lé bien méritan.

 Justin 


Kanalreunion.com