Oté

Séktarism épi bon gouvèrnans i marsh pa bien ansanm !

Justin / 18 juillet 2012

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité,
Mi koné pa kosa ou i pans dsi la vizit minis péi l’Outre-mèr, mé sré intérésan konèt pars, fitintan, zot, bann rouj-de-fon, zot té i krétik bann minis, mèm lo pti prézidan, kan té i vien rann vizit La Rényon. Zot té i arprosh souvan défoi té i pas par Sint-Mari, par Tampon, par Sin-Pyèr, té i rann vizit mésyé Didier, mésyé Lagourgue, é l’ot, é l’ot, mé té i pas pa par l’androi bann rouj-de-fon, sansa bann roz bonbon té mèr, sansa dépité... Pou zot, banna té i réspèk pa tout bann z’élu la Répiblik, vi k’té i triy, an parmi, sak zot i vé frékanté. Pou zot, banna té séktèr. Mi pans zot i doi trouv sèt-la i komans bien, pars sanm pou moin, li osi, dan son kafé, nana triyaz. Tok ! Pran sa pou toi.

Justin la fé pou répons :
Mon vyé matant k’i koz touzour la boush rouvèr, si ou té i égzis pa, mi pans narté fali invant aou,
Mi konpran out zès. Sanm pou moin, ou i vé fé romark anou lo minis la pa fé in kont sanm nout Parti kominis rényoné. Pétèt sak ou i di lé vré dsi désèrtin poin : lé sir, lo minis la pa mèt anou anlèr, konm la pa mèt la droit anlèr non pli. Astèr, lo minis nana son l’anploi di tan, é ni koné pa vréman kisa li la vi, kisa li la pa vi an déor d’sak la parèt dann télé épi dann zournal. Solman nana in n’afèr lé sir : séktarism la pa bon. Té pa bon pou la droit kan li té i gouvèrn lo péi. I pé pa z’èt bon pou bann sosyalis o pouvoir zordi. Si zot i anbèk dann in shomin konmsa, lé riskab fé éshoué zot politik pou l’Outre-mèr, mé nou va oir pli d’van. Obli pa kant mèm ousa lo séktarism l’amèn Sarkozy épi son gouvèrnman. Mé moin lé sir, ou i obli pa. Tok ! Pran sa pou ou !

Justin


Kanalreunion.com