Oté

Sérèss la d’si li dwa rann a nou kont !

Justin / 23 févrié 2016

Kisa la di nout prézidan i gnor loutromèr ? Sak la di sa i ramass mantèr, la prèv, an so moman lo prézidan la désid rann vizit nout tout, tout loutromèr. La zordi li la komanss par lo pasifik èk wallis é futuna aprésa li sava an polinézy, ziska tan in zour li va pass par isi èk nou, i prétan konm sa li vé war nout tout ziska lané proshinn pétèt ziska zéléksyon ? Konm sa pétèt sé lo moman pou fé in pé lo bilan d’si sak li la fé, d’si sak la pokor fé, sak i rèt pou fé.

Dann son program 2012, pou loutromèr an zénéral lavé 30 zangagman, boudikont sak li lavé promèt dann son kanpagn, la lit kont lo shomaz, la lit kont la vi shèr, li la promèt a nou, li té i sava rovwar lo tarif la bank, lavé promèt osi inn dé kontra d’zénérasyon, li té i dwa rovwar osi loktrwa-d’mèr, léta la prizon osi, pou èt an réglo, té i dwa fé lo linivérsité d’loséan indien…… Ousa i lé tousala ?

Sa sé pou lo zénéral. Konm sa néna 30 zangagman. Pou nou la Rényon, an déor d’tousala, lo Prézidan la di lo 1 avril 2012 a sin lui “Vik ni ansoufèr plis ké tout bann rézyon déor par rapor lo pri karbiran, vik nou na bozwin d’infrastriktir, ni dwa alé vèr lo tram-train“ i pé pa mié dir. Mi koné pa si lo tram-train lé an parmi lo 30 zangagman, ariv a li, mé sérèss la d’si li dwa rann a nou kont !


Kanalreunion.com