Oté

Shakinn i oi l’èr dsi son prop montr ! A Shakinn lo droi fé valoir son poinn vizé !

Justin / 14 out 2015

Dopi la komans lo zé dé z’il dopi in bon koup z’ané, moin la touzour pansé nana kékshoz k’i klosh pa ladan. Kosa k’i klosh pa ? Dizon pou Mayotte avèk La Rényon sa in bann zé réjyonal. Pou Madégaskar, Ile Maurice é lé komor, plis lé Maldiv sa in zé nasyonal : lé normal vi ké zot kalité d’nasyon lé rokoni par l’ONU é par le bann z’organizasyon internasyonal. Donk l’èr-la, nana in kontradiksion.

Shak péi nana in l’ime épi in drapo. Pou lo bann péi indépandan zot na z’ot drapo épi z’ot l’ime. Mé pou La Rényon avèk Mayotte : « Kèl ime é kèl drapo ? » La Marséyèz épi lo drapo blé-blan-rouz. Na in n’afèr k’i kol pa ladan. Zot i pans La Rényon, épi Mayotte nana dé zékip de Frans ? Lo nivo la pa sa. Sof pou in éspor rant-rant ni pé pa dir lo dé l’ékip i sava pou roprézant La Frans. Ni roprézant anou, pars nou lé kapab roprézant anou, mé ni roprézant pa La Frans. Sof si La Frans i anvoye son gran lékip é ziska zordi sa lé pa a l’ord di zour ! Mi éspèr.

Fransh vérité, nana in sèrtin nonm péi, i fé dé rankont sportif avèk dé réjyon. Sa sé la vérité ! Donk la lozik i vé ké shak péi nana son drapo nasyonal sansa son drapo réjyonal. Shak péi na son l’ime nasyonal é dé i doi an avoir z’ot ime réjyonal. Toulmoun i partisip konmsa mèm ! Ni fré pityé d’apré zot ? Mi pans pa, nou sré égal avèk nou mèm. Zot i pans nout drapo réjyonal (touléka pou La Rényon) i fé pa valoir anou ? Pou la késtyonn mizik mi pans nout mizisien é bann mizisien Mayotte lé bien kapab fé in l’ime pou fé pété, si tèlman ké nout kèr i bate dan nout do.
Ala koman mi oi bann zé bann zil l’oséan indien. La pa konm ou i oi, la pa konm X, Y, ou sinonsa Z i oi. Mé konm di lo kont : sé mon fasonn oir lé shoz, é konm i di : « Shakinn i oi l’èr dsi son prop montr ! ». A shakinn l’okazion fé valoir son poinn vizé.


Kanalreunion.com