Oté

Shakinn i shoizi lo manyèr pou fé son parkour !

Justin / 14 janvier 2010

Dann toute gran vil, in pé partou, apré an avoir kass lo tramway, i arfé ali. Issi La Rényon, nou l’avé lo train épi nou la kassé, é zordi Konsèy rézyonal, avèk l’ède l’État, épi bann l’antropriz i sèy mète anlèr lo tram-train. Lé vré, in tram-train, sa lé dèstiné rann anou in gran sèrvis : la poin pou pèrde lo tan dann l’anboutéyaz... la poin pou éskinte oute nèr konm i fé dann loto déssi la route... arzoute èk sa lékonomi ou i pé fèr èk in moiyin transpor konmsa.
Solman, alé pa kroir tram-train va karsèr noute libèrté pou shoizi noute fasson alé travay, alé promèné, alé ankor fé nout komissyon. Byin sir, nora lo kar... sak i vé va pran. Nora loto plizanpli éléktrik... in pé va pran, kisoi an lokasyon, kisoi an propriyétèr. Nora konm zordi éskoutèr, sansa moto, sak i vé ou sak i pé va pran. Nora vélo, mèm vélo éléktrik… donkalor, zot i oi, la pa lo tram-train va priv anou nout libèrté. Akoz pa bato pou sorte dann sid, é alé dann nor é vèrsi-vèrsa. Ni arète la pars noré tro pou di.
Alor, kan in pé i di i fo shoizi rant lo tram-train épi la route litoral, fé inn, fé pa l’ote. La pa bon dir in n’afèr konmsa, pars sé priv demoun z’ot libèrté shoizi lo méyèr moiyin pou déplasé, solon zot gou. Sé oubli ankor lé z’ote moiyin pou déplasé konm nou la di tanto-la. Dizon in moiyin i défann pa lé z’ot é sé sa lo réspé la libèrté demoun La Rényon. Shakinn i doi shoizi sak li trouv méyèr pou li, pou son famiy, pou son travay, pou son l’antropriz, pou son pouvoir d’asha... pou l’anbyans. Toute sak i fé ké ou i pé voiyaz byin. Shakinn i doi an avoir lo moiyin shoizi lo manyèr pou fé son parkour.

Justin


Kanalreunion.com