Shante ton konte, domin ta fète !

Na dé foi, bann gran résponsab i di in n’afèr épi lé shoz i bouj pa... touléka, i bouj pa assé vite, é dan lo sans lo kozman lo boug. Mèm si sé lo Prézidan la Répiblik la kozé, mèm si li la fé konm k’i diré in vré sérémoni pou fé son z’anons. I diré son bann minis i fé pa tro in konte ansanm sak zot patron la di.
In légzanp ? Méssyé Sarkozy la di i sar donn bann Domyin travay dan l’androi zot i viv, plito k’fé vnir demoun, par karguézon, épi obliz bann Domyin alé okip in post an Frans… byinsir li koz pou bann fonksyonèr. Kozman-la li la di lo sis novanm, mé konm k’i dire, in pé la pankor majine lé tan pou mète sa an aplikasyon. La prèv ? In bann poféssèr i sort gingn tout zot diplome, olèrk donn azot in post issi, la déside anvoy azot Créteil, vi k’i paré sa in lakadémi lé pa to roshèrshé.
Konm avan ? Oui konm avan ! Malgré diskour lo Prézidan ? Oui malgré son kozman, malgré son désizyon. Pétète lo Réktora va fé konm l’ané passé, va fé vni in kota proféssèr an plis, konmsa apré li va di li gingn pa done toute amontrèr rényoné travay sir plass.
Bin, an atandan, kèl konte i fé avèk promèss lo prézidan ? Kèl konte ? Konm bann vyé moun i di souvann foi, an parlan pa réspé : « shante ton konte, domin ta fète ! ».

 Justin