Oté

« Shartyé i pé gingn somèy, kan bèf i koné shomin »

In kozman pou la rout

Justin / 16 févrié 2017

Lé vré, isi La Rényon i trouv pi bonpé bèf atlé èk sharète, mé bann z’ansien i ansouvien bien kan l’avé sharète bèf in pé partou dann shomin : kisoi pou amenn kann balans, kisoi pou artourn son kaz a vid, kisoi pou alé rode la paye, sansa shèrch dolo. Anplis ké sa, mi rapèl, souvan dé foi, moin téi trouv sharète bèf avèk shartyé apré dormi dan la kès… Kosa téi ariv ? Arien, la plipar d’tan, pars in bèf bien drésé i gingn rant son kaz son tousèl. Donk sans prop ni oi bien kosa sa i vé dir, mé sans figiré ? Sans figiré i vé dir si shakinn i koné bien sak li na pou fé, lo mèt la poin pou trakasé : tout travaye sar fé, konm k’i fo, é l’èr k’i fo. Alé ! Mi lès azot kass z’ot koko la dsi-sirtou pou sak i koné arienk fé san noir pou arien-é ni artrouv pli d’van sipétadyé.


Kanalreunion.com