Oté

Shasé lo natirèl, li rovyin o galo !

Justin / 5 mé 2015

Bann kamarad « Nou lé kapab dan nout péi » i sort soulèv in lièv. Inn do plis. A nou dan lo sid kan ni parl in boug lé rizé, in boug lé intélizan, ni di konmsa, li azi konm inn « ti lièv la mar ». Mé la pou nout bann kamarad i sazi pa d’sa. I sazi din gro léskandal si lé vré pou vréman. A mwin mi an dout pa ditou, bann kamarad la lé séryé, i koz pa toratravèr. Donkalor, sipozons lé vré, ni pé di sé in léskandal doplis. Sa i spasré dann travay. Sé pa pou rézon néna makrotaz dann travay, sé pa pousa ditou, sé inn késtyon larzan rant lin a lot.

Figir a zot sé in bwat ki fé travay domoun, kiswa domoun isi, kiswa domoun déor konm nou néna labitid war tou lé zour dan tout bwat isi, solman pou koz konm bann moun la ot « la ou lo ba blèss » dan lo lantropriz, travayèr té anboshé déor i gingn karant sèt pour san plis travayèr la été anboshé lokal. Ala lo léskandal. Alé pa krwar sak té anboshé déor li fé karant sèt pou san travay an plis, I prétan i fé minm travay bayoun. Pétèt ispouré, parské bann déor néna diplom an pliss ? I prétan ké non.

A mwin mi di, pétèt sé inn ti réstan lontan, lontan minm, sa lé dan la tèt domoun, sa i éfass pa konm sa minm, défwa fo romont lwin dan lo tan pou byin konprann lo tik-tak, koman nou viv é poukoué banna i ral a nou konmsa. In pé i apèl sa in rolan. Pétèt mi tronp, pétèt mi tronp pa osi. I dwa èt inn ti réstan lontan pou vréman vik tousala lé fé an kashièt pou pa ké domoun i koné. Sinonsa, poukoué in pé i gingn, poukoué dot i pas lo mèr ? Bann la ot i di osi « shasé lo natirèl, li rovyin o galo !


Kanalreunion.com