Oté

Shat shodé i krin mèm lo fré !

Justin / 16 mars 2011

Matante Zélida la ékrir Justin :
Mon shèr nové, mon spès salté,
Ala zéléksyon Konsèy zénéral l’ariv ankor. Moin lé kontan, pars moin lé sir bann rouj-de-fon i san l’ay. Pou kossa ? Pars l’ané passé, zot la gingn in bon kou d’rès trankil é moin lé sir sar ankor parèy so foi issi. Pou koué moin lé sir d’sa, pars, sanm pou moin, zot i sava pèrde la mazorité Konsèy zénéral épi l’ékip méssyé Didier v’ariv promyé. Konmsa, Konsèy zénéral plis Konsèy réjyonal va travay min dan la min é va rash lo kro bann rouj. Vi vé, vi vé pa, sa va éspas konm mi di a vou é pa otroman. Pou l’pli gran bien lo moun dann bézoin ; Tok ! Pran sa pou toi !

Justin la fé pou répons :
Mon vyé matant ki koz touzour la boush rouvèr,
Sé kan lo match la fini k’i oi sak la gagné. Avan l’èr la pa l’èr, apré l’èr la pi l’èr. Pars d’apré vou, Sarko la komann in viktoir la droite La Rényon, é vi k’li la komandé, li va gingné ? Matant, demoun la fine vi koman la doite l’UMP la kass La Rényon, é sof si lo moun lé fou, mé li sar pa prann in risk konmsa. Kat san milyon travay la koupé déssi Tampon. In milyar sink san milyon la koupé déssi la route litoral kat voi. In milyar sink san la koupé déssi shantyé tram-train. D’apré vou, tout bann z’ouvriyé la pèrd zot travay lé paré pou arkomans konm sa ? Tousa bann l’antropriz l’apré mor inn apré l’ote, ou i pans zot va kontant azot avèk pir k’sak la fé l’ané dèrnyèr ? Arzoute èk sa konm la vi lé shèr ! Konm gouvèrnman la raz la pinte bann z’anploiyé, vi kroi zot lé konm zoizo bélyé, zot na la tay dan la tète ? Na ossi in n’afèr i fo ou i mète dann out tète : la majorité Konsèy zénéral, sé in majorité pliriyèl ; Nana toute koulèr politik la-dan, é toute lé dakor pou travay konm k’i fo pou bann Rényoné.
M’a dir aou franshman, so kou issi, i arfé pi konm foi pasé la ! In shat shodé i krin ziska lo fré !

Justin


Kanalreunion.com