Oté

Shomaz ?
Pèrsone lé vaksiné kont maladi-la !

Justin / 13 juillet 2011

Mi koné pa si zot la antann, konm moin, in n’afèr komsa. Inkroiyab mé vré mi di azot ! Dann désèrtin l’androi, zanfan bann shomèr na poin lo droi manj la kantine. Ousa sa i éspas ? Sirman dann in péi na poin la démokrasi, na poin la libèrté... in péi ousa la sosyété lé inimène vèy pa ! Sa i éspas dann in péi nana shomèr, pour sir ! A tou lé kou ! Zot i pans in n’afèr konmsa sa i pé éspas dann in péi shanpyon lé droi de l’om. A non alor !

Poitan, Thonon-les-Bains, sa la pa dan la Frans sa ? Biensir, sa lé dan la Frans, é an plis ké sa, sa la pa in vil si tèlman pov. Li sré mèm plito rish, plito joli, anfin in vil dan la Frans érèz. Sé la mèm sa i sa ariv proshin rantré. Pou kosa ? Pars a s’ki prétan, na poin asé la plas dann la kantine bann l’ékol. La kantine lé tro pti. L’èr-la, banna la déside rézèrv la kantine pou zanfan d’moun i travay. Bin, akoz la pa fé lo kontrèr ? Pars, sanm pou moin, banna i mazine in shomèr, sa na poin arien pou fèr. Poitan, i fo alé rode travay port-an-port, l’izine an l’izine, komèrs an komèrs. I fo rode dann zournal ousa na boulo. Mèm i fo ou i vien kan Pol-anploi i apèl aou. Arzout èk sa ou i doi alé rode in pé partou ousa nana manzé bon marshé... mèm i fo ou i sava oir Momon-papa lé la, sansa d’ote. Arzout èk sa amène marmay lékol, alé rode marmay lo soir, okip azot mèrkrodi, samdi, dimansh. Epi, sa la pa bézoin kashyété, i fo alé rode in pti boulo ; Lé dir kan i fé sort aou déor d’la vi sosyal konmsa, sansa kan ou i gingn mèm pa mète lo pyé anndan. Sak lo pla lé bien gonflé, bann moun bien friké, zot i pé pa konète sa. Pou zot, bann shomèr na poin arien pou fèr, i mète la ptite dsi la gross, lindi dsi mardi, i tourn lo pous dann in sans, épi dan l’ote.

Kansa zot i pé konète in n’afèr konmsa ? Solman l’èr zot osi i tonm dan la fos komine shomaz. Mé sa i pé pa ariv azot ! Alé oir, pèrsone lé pa a l’abri d’in dézagréman konmsa. Kroi amoin ! Tardra viendra. Si ou i krash anlèr, sa i artonm dsi out né. Pèrsone lé vaksiné kont maladi-la !

Justin


Kanalreunion.com