Oté

Shomin Gran-Boi sa lé long, ti-pa, ti-pa n’arivé !

Justin / 9 zwin 2012

Nana in provèrb — La Rényon i apèl sa galman in patoi — mi èm bien. Patoi-la i di konmsa : « Done in moun in poison, li va manj in jour ! aprann ali pèsh poison, li va gingn manj toujour ! ». Biensir, sa in provèrb, donk li parl in pé an parabol, mé dan la sityasion ké ni lé, lé posib trouv in konduite pou tenir. In l’égzanp : done in moun in pti kontra, li va gingn son pourkoi pou in pti pé d’tan, mé li gingn ar pa fé in vi akséptab èk sa. Aprann ali in métyé, done ali in travay dan so métyé-la, li va gingn fé in projé pou son vi.

Zistoman, sé lo travay a titré k’i mank anou koméla, vi k’na san-sinkant mil pèrsone i rod travay épi i trouv pa. Sé zistoman sak nout parti la konpri kan li di k’i fo arète boush lo zyé Kréol èk pti travay an sold. An kontrèr, dévlop lo péi, protèz son l’anvironman, èd okip z’anfan, andikapé, vyé moun, la na dé shans nou va fé in l’avnir. Sa i vé pa dir bann mézir sosyal i kont pa pou arien, sa i fo pou trouv in solisyon toutsuit, mé la pa la solisyon ni pou d’moun, ni pou lo péi. La solisyon, sé lo dévlopman é sé sak i fo anou.

Mi souvien, la pèt in priz dé guèl rant in kandida kominis épi kandida sosyalis dsi in marshé forin. Pars lo dézyèm la di lo promyé i sousyé pa l’imédya, mé l’ot la réponn ali : i fo sousyé l’imédya, mé i fo pans galman l’avnir. Biensir, kandida sosyalis la kontinyé dan la mansonjri, mé moin la romarké, plizanplis li la pran pou li in bon par program lo kandida kominis. Pars, boudikont, tout demoun i pé romark nou la rézon : okip zordi par égzanp avèk dé-san éro pou bann moun pov, diminyé lo koutan la vi, kal bann pri loiyé, lé bon. Mé prépar domin, épi apré domin, épi apré ankor. Ala sak i apèl shomin dévlopman. Shomin Gran-Boi sa lé long, ti-pa, ti-pa n’arivé !

Justin


Kanalreunion.com