Oté

Shomin Gran Boi, sa lé long, ti-pa, ti-pa v’arivé !

Justin / 11 mars 2013

I pé di, bann z’inpérialis-la, la ont la poin ! Komn di lo kont, koshon la fine manjé ! Sirtou bann z’inpérialis z’Anglé. Pou kosa mi di sa ? Pars, figuir azot, yèr, l’avé in référandome dann bann z’il Malouine, konm bann z’Arzantin i di, dann Falkland, konm bann z’Anglé i di. Pou kosa in référandome ? Pars bann z’Anglé i vé done la prèv demoun dan l’androi lé pou rès anmaré sanm l’Anglétèr, épi bann z’Arzantin i larg pa banna é i arèt pa réklam lo bann z’il. Zot i koné ousa bann z’il-la i lé ? Lé dsi la point l’Amérik di sid, dan lo bout l’Arzantine an ba la-ba. Ousa i lé l’Anglétèr ? Dann l’Érop, kaziman koté la Frans an o la-ba ! Bin alor, pou kosa bann z’Anglé la parti bour zot né an ba la-ba ? Pars zot i éstime sa sé in koloni é zot i vé gard sa pou zot. La prèv ? Kan bann z’Arzantin la déklansh in guèr pou la rokonkèt bann Malouine, l’Anglétèr la anvoy son bann solda é zot la ropran sak zot i éstime konm zot bien.

In référandome, sa lé démokratik, sirtou kan ou la fine instal dé mil z’Anglé dann bann z’il-la. Démokratik ? Sa mèm lé bon. Mé akoz, kan zot la désid fé in park marin dann Chagos, zot la pa fé in référandome pou bann Chagosien, sansa mèm pou bann Morisien vi k’Chagos té in dépandans l’il Moris ? Solman, sé in drol démokrasi pars la shas bann Chagosien épi i di l’il Moris, sa i rogard pa li. L’èr-la, si i ékout Wikiliks, la fé lo park marin éspésialman konm sa bann Morisien i fèrm zot také é bann Chagosien i ronons rotourn shé zot. In loi pou Malouine, in loi pou Chagos, é pa lo mèm loi siouplé.
Mé ni koné bann Chagosien i ronons pa pou rotourn shé zot, é zot i lès pa l’Anglétèr fé ninport de koi. Par égzanp, dovan in tribinal z’anglé, bann Chagosien l’apré atak lo park marin. Par égzanp, dovan tribinal, la mèr gouvèrnman morisien, pou son par, l’apré atak park marin. Kosa v’arivé ? Ni koné pa, mé sanm pou moin, kanar z’Anglé lé kant mèm in pé noir-noir.

Mi dout pa ké bann z’Anglé instalé dann Malouine va di zot lé pou fèr parti l’Anglétèr. Mi dout pa, mé sa i vé pa dir bann z’Anglé la gagné définitivman ! Mi dout pa bann Chagosien na ankor pou lité avan gingn zot droi, mé sa i vé pa dir zot i gingn ar pa in zour. La vérité i avans dousman, mé la vérité i avans kant mèm. Konm i di dann maloya : "Shomin Gran Boi, sa lé long, ti-pa, ti-pa v’arivé !".

 Justin 


Kanalreunion.com