Oté

« Shomin l’anfèr, shomin dalé avèk bon l’intansyon ! »

In kozman pou la rout

Justin / 15 mars 2016

Zot i koné provèrb fransé sak i di konmsa : « L’anfèr lé pavé avèk bon l’intansyon ». Kosa sa i vé dir kan ou i koné l’intansyon i vo l’aksyon. Donk si na in bon l’intansyon, sanm pou moin, sa i doi pa amenn demoun dann shomin l’anfèr. Si lo l’intansyon lé mové, l’èr-la lo l’aksyon lé kontaminé.

Alors, mon kozman i vo pa arien vi tout sak moin la fine di ziska isi ? Solman si lo bon l’aksyon i suiv pa lo bon l’intansyon, dizon ou lé néglizan, dizon galman ou la poin lo bon kouraz k’i fo… Pli pir, si ou i koné kosa k’i fo fèr, é ou i fé pa, astèr lo tré-o i pé arprosh aou in n’afèr konmsa é out manyèr fèr i pé amenn aou dann shomin l’anfèr.

Ou i sov pa out am, ou i désov ali... Apré zot i fé kosa ké zot i vé, la pa moin lo ziz arbit siprèm. La pa moin k’i tienbo lo siflète. Fransh vérité !


Kanalreunion.com