Oté

Si bann fransé té i désid vote pou in zangouni d’onèr ?

Témoignages.re / 29 novanm 2016

Mi sort oir dann télé Mésyé Fillon la ranport lo primèr la droite avèk in bonpé voi é in gran mazorité. Bon pou sa mèm ! Bon ? Sa lé a oir pars si zamé in zour néna in gran prozé la kass sosyal lé bien sète so mésyé-la, é si li gingn lo zéléksyon mi pans bann fransé, bann ti-kolon sirtou, nana ankor la raz pou manzé.

Bann fransé d’frans solman ? Non va, bann moun l’outre-mèr galman, bann ankarté fransé. Pars i promète tout la bann in séraz sintir konm la pankor fé ziska zordi, mèm si la fine sèr inn-dé kran avèk Sarkozy épi avèk Hollande-in famé marshann parol sète la ! Mi koné pa si zot la rogard in pé lo program Fillon, mé lé a oir, avan k’i tonm tro tar, pars nou lé promi pou pass ankor sink z’ané pou tir la lang konm demoun pandiyé avèk in kord.

Si li gingn zéléksyon ! é pou kosa kli gingn ré pa ? Tout médya la fine désid paryé dsi shoval la. Tout gro kolon nana l’éspoir gingn ankor plis lo pikayon konm ziska koméla ! Tout bann ti-kolon la fine pèrd l’éspoir si tèlman la marshann parol avèk zot épi bann médya i ésplik azot la p’asé, mète ankor ! In bonpé z’intélékstyèl, filozof dann ta, i pran konm in dovoir pinn an nèv sak lé vyé tré-vyé, izé épi izazé ! Bann bavar dann télé I diskite an boukl dsi lo méyèr manyèr fouy lo trou dann sinter lo pèp !

Poitan na in pé I di épi I répète La Frans, épi l’Erop épi bann gran péi la zamé été rish konm zordi. Si tèlman rish ké bann bankyé i baz dsi nout l’arzan pou répar tout bann z’érèr zot la fé, zot I fé, épi zot va fèr pars larzan mèm si sé la moné zako, I sort in l’androi pou alé dann in n’ot mé na touzour lo mèm kalité d’moun poinn dépar konm poin d’ arivé.

L’opinyon l’apré pèrd l’èr é kan l’opinyon I pèrd l’èr I fo fé bien antansyon pars lé posib demoun I vote pou in zangouni, kisoi l’Fillon, k’I soi lo Marine, ki soi in n’ot pars na plizyèr I réklam lo tit zangouni d’onèr.

* zangouni sé baba shifon, sé l’épouvantaye galman.


Kanalreunion.com