Oté

Si i manj pa pork, zot va manj koshon ! A bon ?

Justin / 30 mars 2015

Moin na konm l’inprésyon nana kékshoz dann la tète désèrtin i tourn pa ron : Mi parl de koué, moin la ? Mi parl ké laba, dann La Frans, nana in pé i vé siprime lo méni ranplasman. In ménu i fé pou bann moun i manj pa koshon. L’èr-la, i fé bèf, poulé sansa in n’ot afèr dann la kantine marmay l’ékol. Moin, sa i jènn pa moin, mé in pé d’maloki, sa i jenn azot.

Zot i trouv sa i kout shèr épi, pli visyé ankor, zot I trouv tout marmay I doi manj parèy vi ké nou lé an répiblik, vi ké la répiblik lé layik épi d’ot koméraz ankor. Sa bann fron nasyonal i di sa é astèr sé lo Sarkozy k’i di sa son tour. Donk, majine azot in pé kosa bann demoun va pansé… Parl fète, zot i koné bann mizilman i manj pa koshon, zot i koné a s’ki paré bann juif osi i manj pa koshon é pi nana d’ot rolijyon ankor nana d’ot z’interdiksyon alimantèr. L’èr-la, d’apré bann moun intoléran i fo pa tienbo kont ! Sé pa si zot i rann azot kont si l’anvi i vien fé pass sa dann in loi. Si in tak-tik konmsa i dovien obligatoir par la loi… akoz pa la konstitisyon.

Lé déza konpliké mé majine in pé isi La Rényon : pou la késtyonn rolijyon, in pé i manj pa koshon konm laba dan La Frans, in pé-in bon pé !-i manj pa bèf konm bann tamoul par ébzanp, in pé i manj pa kabri pa par gou mé par rolijyon. Alor kosa i fo fèr ? Zot i oi bien sé pou fé lèv la guèr, mé la guèr nana déza. Donk la p’asé, mète ankor ?… Konm di lo kont, si i manj pa koshon va manj pork. Alé dormi don ! Bann fou konmsa, mi pans i fo anmaré.


Kanalreunion.com