Oté

Si i pous anou a bout... boykot, sa in mo i pé an avoir in sans !

Justin / 28 out 2014

Zot i rapèl in n’afèr ? Dann tan l’avé in gran kivète-fosé, si zot i vé !-rant bann blan tout koulèr é bann domèstik, tout koulèr galman. In pé té i manj, téi boir lé zot debout gète. Majine in pé léta bann doméstik lé d’dan kan lo vant i grouy, kan zot boush i fé d’lo, é kan l’apré majine out zanfan i manz ar pa zamé manzé konmsa, i konèt ar pa lo gou bann kékshoz konmsa.

Pou kosa mi di sa ? Mi sava pa anparl azot manzé, fété, é tou sak i s’ansui, mi sar parl azot la rényon la COI-komisyon l’oséan indien. .Ziska zordi mi pansé nout péi-mi vé dir La Rényon-lé manm la COI é nou té i pé travay avèk lé zot dann l’intéré lé inn é lé z’ot. Mi apèrsoi, zordi moin la tronpé,sé La Frans lé dann la komisyon é par nou, mé nou na poin nout mo. In légzanp ? L’APE akor partenarial ékonomik- sa sé in zakor, an prinsip dann l’intéré sak i figir dann kontra é dsi la késtyonn lékonomi. An prinsip tout nana kékshoz pou gagné. Normal ! Tout, mé pa nou ! La Frans nana in bonpé z’afèr, kisoi la téknolozi, kisoi bann produi élaboré(konm i di) kisoi ankor son kopérasyon syantifik. Lé zot péi nana zot marshandiz pou fé rant dann l’inyon éropéène, donk z’afèr pou gagné. Mé nou, dann tousa ? Pétète nou na dé shoz mé mi oi pa kosa. Sèl z’afèr mi oi nou lé riskab pèrd troi mil anploi dirèk. La pa moin k’i di sa,sé in patron la anons so z’afèr la. Bann plantèr zot osi zot la fine konprann i san l’ay pou zot, si nout marshé lé anvayi avèk bann frui épi bann légime i sort déor. Donk, ala in kontra ,pou l’moman va désèrv anou, pars nou mèm mi pans pa ni pé fé la konkirans èk lé zot.

Mi vé pa dir, désèrtin i ariv sar pa débarbote azot dan l’afèr mé an zénéral nout z’intéré va pass sou la tab. Mi rapèl in zistoir vré moin la fine rakonté. L’ané dèrnyèr moin lété Maurice é moin la lir tou lé zour bann zournal morisien é moin la aprann in n’afèr : in sosyété moris, in l’invéstisèr rényoné, é in l’invéstisèr indien la loué èk Mozanbik in siper gran térin.Pou kosa d’aopré zot ? Pou fé plant légime avèk bann frui parèy ké lé n’ot. Pou fé kosa ? Pou ésport dsi..La Rényon, an prévizyon lo l’APE i sava signé.. ;Sé in l’égzanp mé nana d’ot épi dann tout séktèr i pé konkirans anou é pa La Frans, é pa l’erop.

Kèl répons i pé fé banna ? Kèl kontratak i pé fé ? Si nou lé patriyot...si i pous anou a bout, si La frans i oi pa pli loin ké lo out nout né..Boykot, sa in mo i pé vouloir dir in n’afèr., in mo i pé an avoir in sans.

Justin

NB ;In provèrb pou la rout :"Ki bat di bèr i lish son doi !".Zot i konpran kosa sa i vé dir. Dann la COI na in pé i défann zot zintéré é nou nou la poin la parol..Mi vé pa komann pèrsone, mé mi pans in rényoné bien patriyot, avèk in konsyans rényonèz, té i doi lèv son kan é dévir son do....


Kanalreunion.com