Oté

Si i vann pa tro shèr, kliyan i sava pa rod o pli loin !

Justin / 11 févrié 2013

Zot la antann parl lo gran éskandal dsi la viann shoval ? Sa i sort éspasé somèn dèrnièr. Kosa l’arivé ? Figuir azot marmay, na in l’antropriz la Frans la anvoy dann in pé tout péi l’Erop in bann produi marké "pir bèf". Mé a s’ki paré, lo pir bèf té mélanzé èk lo pir viann shoval. Kan lo bann laboratoir in l’antropriz la dékouv lo poto roz, li l’été bien oblizé arfé vnir son bann produi. Pars l’avé la mansonjri dsi lo produi.

Soman, kisa lé lo résponsab ? Lé pa fasil pou konèt pars sa i sort in koté, i sava in n’ot koté, épizapré in troizièm koté, é bien sir, toulmoun i di zot na poin arien pou roproshé. Na inn i di, li la fé étidié dan son laboratoir lo viann, li la mèm fé fèr bann tèst ADN, é sé konm sa ké li la dékouv lo z’afèr. Na in n’ot i di, li lé pou arien si bann Roumin la mélanj la viann bèf èk la viann shoval. In n’ot ankor i di, la done azot la viann pou travay épi pou kui bann lazagn, la pa di azot té lazagn bèf pars, fransh vérité, zot nora gingn fé la diférans rant la viann shoval èk la viann bèf. Ziska moin nora gingn fé sa ! Touléka mi kroi. José Bové, pou son par, i rakont, bann voitir shoval sar défandi roul dsi bann shomin la Roumani. Donk, tousa shoval i sèrv pi arien, donk i tié azot, é konm na in bonpé, lo pri i dégringol. L’èr-la, in bann mafia la trouv in tik tak pou gingn in bon moné. Zot la fé pti boush dovan in n’afèr konm sa.

La télé la parti koz èk demoun, in bann ti kolon in pé o-ki. Zot la réponn, zot la pa kas la tèt, provik lo marshndiz, lo pri l’avé bès in pé. Pou mon par, mi kalkil in kou bann marshandiz i vann La Rénion. In l’égzanp ? : sosis inporté. Kisa i di anou na poin in mélanjaj la-dan ? Pars figuir azot, si in l’izine déor la niabou ashté la viann kangourou bon marshé, sansa in n’ot kalité viann, kisa v’alé oir si la pa mélanj sa èk la viann koshon ? Mon matant la di amoin, avèk èl, sa i kol ar pa, pars èl i koné bien lo gou bann viann. Malérèzman, koméla, i pé fé la viann bèf èk lo gou la viann koshon, la viann koshon avèk lo gou la viann in n’ot zanimo. Banna lé madré ! Mé par l’fèt, moin lé sir, provi k’i vann pa tro shèr, mi pans pa kliyan i sava rod pli loin.

Justin


Kanalreunion.com