Oté

Si la vérité na in sèl koulèr, koulèr-la, matant, sé lo rouz

Justin / 30 séptanm 2011

Matante Zélida la ékrir Justin :
Mon shèr nové, mon spès salté,
Fransh vérité, mi konpran pa pou kosa demoun, bann rouj-de-fon anparmi, i kriy la vi lé shèr. Pars si la vi lé shèr, i sifi ké zot i adapt azot èk so vi shèr-la. Moin sé konm sa ké mi oi lé shoz. Si lé vréman vré ké la vi lé shèr konm i di, akoz in pé i pous sharyo konmsa dovan zot ? Akoz nana loto an poundyak l’apré fé l’anboutéyaz partou dési la rout ? Akoz i marsh par dé téléfone portab avèk zot ? Afèr i fé lo ta dovan bann gran sirfas kan i anons in promosyon sof lakèl... kisoi dési manzé, kisoi dési linj, kisoi dési d’ot marshandiz ankor. Si vréman la vi lé shèr, akoz i pran pa lo pli nésésèr pou komansé épi armèt la fantézi pou apré, si na ankor lo moiyin. M’a dir aou in n’afèr, si dmoun lé dann l’an-nuyman, sé par zot mèm. Sétaki i vé ashté plis ké son voizin. La vérité na in sèl koulèr, tanpir si i blèss ; tok, pran sa pou toi !

Justin la fé pou répons :
Mon vyé matant k’i koz touzour la boush rouvèr,
Sak ou i di zordi i étone pa moin, pars in kozman konmsa nana lontan mi antann sa, é la plipar d’tan par la boush demoun nana in pti moiyin par rapor sak lé pov. Pov la poin ? Akoz alor nana in sèy povrété, é akoz plis sinkant pour san dmoun lé dosou sèy-la ? Astèr, lé vré, demoun i pous sharyo dovan zot, mé ou la domann azot si sa i ariv finn moi ? Ou la déza fine domann aou pou kosa, kan nana in distribisyon koli, demoun lé foulé konmsa ? D’apré ou, pars demoun lé antréné pou rouv la min, pou fé lo mandyan. Matant, siouplé, in pé la konsidérasyon pou nout nasyon. Ou i kroir sa in fantézi pou d’moun, viv konm zoizo dsi la bransh ? Ou kroir sa ou ? Pou arzout èk sa, ou l’apré fé plime aou par bann gran sirfas. Ou i ashté in n’afèr, ou i koné pa konbien la kouté, konbien bénéfis apré fé dsi out tète. Anplis ké sa, larzan lé kourt, plizanpli kourt, plizanpli-zanpli kourt, é la vi lé shèr an rézon ! Tank’a la vérité, si na in sèl koulèr konm ou i di, koulèr-la, matant, sé lo rouz... éskiz mon pardon.

Justin


Kanalreunion.com