Oté

Si li lé gonflé, é-bin nou va dégonf ali !

Justin / 16 avril 2012

Dèrnyé foi Sarkozy la vni La Rényon, li la fé son gran miting la-ba Sin-Pyèr. Soidizan, li té i vien dann nout péi, pou vann son program dsi l’outromèr. Domaz pou li, mé son program té sèk, son bann propozisyon kaziman pisa lo shate, Mèm bann zournal la droite la pa fé in fète èk program-la. Zot l’avé konm bonpé dmoun issi, lo linprésyon Sarkozy té i donn azot in zo pou sisé... arienk in zo pou sisé.

Lo tan la passé, la kanpagn la suiv son parkour, mé oplis lo zour zéléksyon i aprosh, oplis i an apèrsoi son program sé in kokiy vide. Mèm si li sa di sa partou, si li sava répète sa dann son bann miting, dann zournal ou sansa dann radyo é dann télé, sa i amène pa li bien loin. Pars rien, si ou i azout èk rien, si ou i miltipliy ali pa rien sa in done pa arien. Trépé plis trépé, sa i donn pa in bonpé. Dizon sé in loi natirèl.

Solman kan ou i vien di in n’afèr konmsa, dann in péi la bézoin in gran plan dévlopman pars li na rotar vèy pa koman, pars son zénès i kontant pi lo sor zot nana, pars anplis ké sa ni oi zour an zour tout sak i pé fèr dann nout péi, dann l’osén Indien galman. Demoun i trouv lo boug lé gonflé vni dir in n’afèr konmsa issi. L’èr-la, demoun i mazine arienk in n’afèr, zot i pans solman si lo boug lé gonflé é bin nou va dégonf ali.

Justin


Kanalreunion.com