Oté

Si na in bon l’avoka pou nou, sé nou !
Lé z’ot, sé martin ki kouzi !

Justin / 13 décembre 2011

Zot i an souvien sa ? Sa in n’afèr la spas l’ané 2009, d’apré sak moin la tandi dir. Dann tan-la, in bann kabalèr lété plis okipé pou ranvèrs la mazorié l’Alyans plito ké trouv solisyon pou fé avans nout péi. Lo préfé, dann tan-la, té i zoué in pé lo rol shèf-an-tèt. In l’idé la pass dann zot tèt — épi zot la bat tanbour dan bann médya pou fé kroir sa té lo shoi bann moun —, sé d’mann la Réjyon fé la rout litoral avan lo tram-trin, alé oir sa lété pa programé konmsa.

Dann in rényon, Paul Vergès la di, pou fé in n’afèr konmsa, i fo konèt l’éshofman klimatik, donk kèl otèr la mèr va monté, an pliské koméla. Bien antandi, pèrsone té i koné pa, donk té pa posib pran in désizyon. Pars di in n’afèr konm mi antann i di souvan, ké la tanpératir moiyène va grinp rant dé épi kat dégré, pétèt sa i kontant lo boug i di sa, mé sa i pèrmèt pa pran in bon désizyon. Kèl otèr i fé la rout-la ? Kèl otèr i fé lo vyadik ? A moins k’i di, fé touzour, va oir lo rès apré.
Pars dann tan-la, l’avé fé la konférans Copenhague. La pa trouv in bon l’akor ! La ranvoy la boul dési Durban, é konférans Durban i sort fini é la pa trouv pou vréman in bon l’akor, mèm si la pa kass tout lo z’afèr… é la ranvoy pou pli tar.
Mé pétèt, in pé i pans, bann ti péi, konm La Rényon, na poin arien pou alé fé la-ba. Pétèt, in pé i pans, bann gran péi va koz pou nou, va trouv solisyon pou nou ; Sak i kroi sa li mèt son doi dan son zyé ziska lo koud, pars dann l’éshofman klimatik, konm dann in bonpé z’afèr inportan, si nou na in bon l’avoka pou nou, sé nou. Lé z’ot, sé martin ki kouzi !

Justin


Kanalreunion.com