Oté

Si ni ashté rényoné ? Sar in révolisyon pou nou

Justin / 27 zwiyé 2015

Toulmoun i koné koman Gandhi té abiyé : avèk in linz an koton blan san fé dantèl. Moin la rode pou kosa ? Sa la pa pou invant in nouvèl mode mé pou déklansh in mouvman la rézistans. Pou kosa la rézistans ? Pars bann z’anglé l’avé kapar lo monopol linz dann l’Inn. A s’ki paré, in zour, Gandhi la di son bann militan : Afèr mète linz i sort dann péi kolonyal si ni vé konbat ali ? Alon fé nout linz par nou mèm, san dantèl, san konplikasyon. Ala koman bann z’indien la komans mète linz toulmoun i koné.zordi.

Dann péi i apèl Burkina Faso l’avé in shèf d’éta té i apèl Sankara – sa in moun bann kolonyalis la tyé sa !-In zour li fé in gran rényon. Li lé abiyé avèk son jean épi son linz oksidantal . Ala ké li di : afèr mète linz konmsa ? Ala ké li mète son linz tradisyonèl, son boubou i apèl sa, épi li di a partir d’zordi, mi sa abiy konmsa… mi sa abiyé éstèr konm nout tradisyon i vé... Demoun la bate la min, mé konm mi di azot ; aprésa bann konplotèr la tyé ali, pars li té in révolisyonèr.

Kosa sa i pé donn anou kom z’idé dann nout péi zordi ? Ni apèrsoi bann loi La Frans, l’érop épi lo mond l’apré fé an sort trang shak zour in pé plis nout l’ékonomi. Ni vé, ni vé pa, mé nou sar blizé défann anou in zour. Koman ? Sré bien si ni pé ashète rényoné é si La rényon i goumant son bann prodiksyon. Zot i pans pa, sar in révolisyon pou nout péi, é pou nou ?


Kanalreunion.com