Oté

Si ni bat lo zié lo gro vinkèr di kinkéna sé zot !

Justin / 26 mars 2016

In séktèr ki bat de l’èl pou vréman sé séktèr lanplwa, oukiswa isi oukiswa déor, sak i paryé in moné la d’si odrémié prévni tout d’suit, larzan lé zété. Minm si tanzaot néna i mèt in kal sou la port pou anpèsh bat, minm si désertin i kass a zot an kat antouka zordi lo résilta lé la. Pou lèr, lé konm di lo kont, lé konm si i mèt in kotèr d’si in zamb de bwa. Lo dérnyé rosansman févrié la rivé, konm isi, konm déor, shomaz la goumanté.

L’otèr tousala, i prétan sé lo kod di travay. I di, li soré tro rizid. Po lo potrona ki arèt pa an souplingn a zot, pou fé diminié lo shomaz an konsékans i fo absoliman tash manyèr, mèt bann travayèr déor pli fasilman. Alé nazé anndan la ou. I pran a nou pou marmay i vyin énèt ou koué ? I di, pli fasi va fout déor, pli fasil va rokrité. Ala in lékwasyon mi konpran pa ditou. Lé éspésyalis i di, ankor pou inn, sé la zénèss gran pérdan anndan la.

Pwatan lo gouvérnman la fann larzan déza pou favoriz lanbosh, in nafèr konm 41 miliar i di, minm lo patron dé patron an kontantman, mandoné la fé in parad èk in pin’s d’si son léstoma “Pou in million lanplwa“. Oukilé lo in million lanplwa ? Mazinn in kou, si ni bat lo zié, si banna i vyinbou kass lo kod di travay, èk lo 41 miliar ankésé, dizon sé zot lo gro vinkèr di kinkéna !


Kanalreunion.com